دھرنے جاری، مہنگائی نال عوام دے صبر دا پیمانہ بھر چکا اے: حافظ نعیم

عوام نوں ریلیف نہ ملیا تاں ملک گیر ہڑتال، اسلام آباد مارچ سمیت ہر آپشن ورتاں گے: امیر جماعت اسلامی جعلی ٹیکس ختم کیتے جاݨ: پریس کانفرنس، ن لیگ اعتراض دی بجائے اپنی سیاسی تاریخ تے نظر مارے: ترجمان

لاہور امیر جماعت اسلامی پاکستان حافظ نعیم الرحمن نے حکومت تے شدید تنقید کردیاں آکھیا اے کہ مہنگائی، پٹرولیم لیوی، ناجائز ٹیکسوں تے آئی پی پیز دے بوجھ تھلے دبے عوام دے صبر دا پیمانہ بھر چکا اے۔ جے حکومت نے فوری طور تے عوام نوں ریلیف نہ دتا تاں احتجاج دا دائرہ ہور ودھا کے ملک گیر ہڑتال، سڑکاں دی بندش تے اسلام آباد مارچ سمیت ہر آپشن ورتاں گے۔ اوہناں جماعت اسلامی دے کارکناں نوں وڈی مزاحمتی تحریک دی تیاری دی ہدایت کیتی تے اعلان کیتا کہ 28 اگست نوں فیصل آباد وچ تاریخی دھرنا دتا جاوے گا۔

ایہناں خیالات دا اظہار اوہناں نے وزیراعلیٰ ہاؤس دے باہر مال روڈ تے جماعت اسلامی دے جاری دھرنے دے دسویں دن شرکاء تے پریس کانفرنس نال خطاب کردیاں کیتا۔ حافظ نعیم الرحمن نے آکھیا کہ چاروں صوبیاں وچ دھرنیاں وچ عوام دی شرکت ودھ رہی اے۔ اوہناں مطالبہ کیتا کہ کوئلے دی درآمدات تے آئی پی پیز دا فرانزک آڈٹ کروایا جاوے، پٹرولیم لیوی تے تمام جعلی ٹیکس فوری ختم کیتے جاݨ، عوام نوں ریلیف دتا جاوے تے روٹی دی قیمت 10 روپے مقرر کیتی جاوے۔ اوہناں ہور آکھیا کہ پنجاب وچ 11 ہزار سکولاں دی نجکاری حکومت دی اپنی ذمہ داریاں توں بھجن دی کوشش اے۔

دوجے پاسے ترجمان جماعت اسلامی نے وزیراعظم دے مشیر رانا ثناء اللہ دی تنقید دا جواب دندیاں آکھیا کہ ن لیگ نوں جماعت اسلامی دے احتجاج تے اعتراض کرن دی بجائے اپنی سیاسی تاریخ دیکھنی چاہیدی اے۔ 2018 وچ نواز شریف دی واپسی تے شہباز شریف تے رانا ثناء اللہ پورے دیس توں صرف 150 بندے اکٹھے کر سکے سن۔ حکومت نوں چاہی دا اے کہ عوامی احتجاج دا مذاق اڈاؤݨ دی بجائے پٹرولیم لیوی ختم کرے تے عوام نوں اصلی ریلیف دیوے۔