مری: مسافراں نال بھری بس کھائی وچ جا ڈگ پئی، 3 بندے جاں بحق، 17 زخمی
مری: ٹائیں کلکوٹ دے مقام اُتے مسافر بس ڈونگھی کھائی وچ جا ڈگی، 3 افراد جاں بحق، 17 زخمی
مری مری نال جڑی باڑیاں ٹائیں کلکوٹ روڈ اُتے مسافر بس ڈونگھی کھائی وچ جا ڈگی، جیدے نتیجے وچ 3 افراد جاں بحق تے 17 زخمی ہو گئے۔ جاں بحق ہون والیاں وچ 2 عورتاں وی شامل نیں۔
بس ایبٹ آباد دی تحصیل لورہ دے علاقے چب گراں توں راولپنڈی ول جا رہی سی کہ لوئر باڑیاں ٹائیں دے مقام اُتے حادثے دا شکار ہو گئی۔ عینی شاہداں دے مطابق ٹائیں کلکوٹ دے مقام اُتے چڑھائی چڑھدیاں بس رک گئی۔ ڈرائیور نے کنڈکٹر نوں گاڑی دے ٹائر دے پچھے پتھر رکھن لئی آکھیا تے آپ گاڑی توں تھلے اتر گیا۔ ایس دوران بس پچھاں ول چل پئی تے ڈونگھی کھائی وچ جا ڈگی۔
جاں بحق ہون والیاں وچ 65 سالہ غلام رضا ساکن موہڑہ شریف، 10 سالہ رستم دی دھی تے 45 سالہ یاسمین سکنہ چب گراں شامل نیں۔
زخمی ہون والیاں وچ 26 سالہ کرن، 3 سالہ مقدس، 2 سالہ اقرا، 50 سالہ رئیسہ بی بی، 65 سالہ شاہدہ بی بی تے 35 سالہ عمران سمیت ہور افراد شامل نیں۔
حادثے دی اطلاع ملدیاں ای پنجاب ایمرجنسی سروس ریسکیو 1122 مری تے خیبر پختونخوا دیاں ریسکیو ٹیمیں موقع اُتے پہنچ گئیاں، جیہناں نے مقامی لوکاں دی مدد نال زخمیواں نوں ہسپتال منتقل کیتا۔
