عمران خان نال بہن نورین تے اہلیہ بشریٰ بی بی دیاں ملاقاتاں
نورین دی کانفرنس روم وچ 40 منٹ ملاقات، میڈیا نال گل بات توں گریز، عمران دی بچیاں نال گل نہ کروائی گئی نہ ساڈی ملاقات، ایہہ توہینِ عدالت اے: علیمہ خان
اسلام آباد بانی پی ٹی آئی عمران خان نال انہاں دی بہن نورین نیازی نے اڈیالہ جیل وچ ملاقات کیتی۔ گزشتہ روز عمران خان تے بشریٰ بی بی نال ملاقاتاں لئی نورین نیازی، بیرسٹر گوہر تے ہور رہنما اڈیالہ جیل پہنچے، تاہم سارے افراد نوں کجھ دیر اوتھے روک لیا گیا۔
بعد وچ نورین نیازی نوں جیل جان دی اجازت دِتی گئی، جتھے انہاں دی عمران خان نال کانفرنس روم وچ 40 منٹ تک ملاقات ہوئی۔ ملاقات توں بعد نورین نیازی فیکٹری ناکہ پہنچیں، تاہم میڈیا نال گل بات توں گریز کیتا تے کسے سوال دا جواب دِتے بغیر گاڑی وچ بیٹھ گئیاں۔
دوجے پاسے عمران خان دی اپنی اہلیہ بشریٰ بی بی نال وی ملاقات ہوئی، جیہڑی کانفرنس روم وچ 35 منٹ تک جاری رہی۔ ملاقات دوران دوناں نے اک دوجے دی صحت تے خیریت دریافت کیتی۔
بشریٰ بی بی نال انہاں دی بھابی مہرالنساء تے بیٹی قورسم مانیکا نے وی ملاقات کیتی، جس توں بعد اوہ جیل توں روانہ ہو گئیاں۔
ایس موقع اُتے علیمہ خان نے میڈیا نال گل کردیاں آکھیا کہ بانی پی ٹی آئی دی ہُن تک بچیاں نال گل نہیں کروائی گئی، میری تے ڈاکٹر عظمیٰ دی ملاقات وی نہیں کروائی گئی، ایہہ توہینِ عدالت اے۔ انہاں آکھیا کہ اسی عدالت دے احکامات دے مطابق چل رہے آں، پتا نہیں حکومت نوں کس گل دا ڈر اے۔
علیمہ خان نے آکھیا کہ ڈاکٹر عظمیٰ تے ڈاکٹر فیصل نال پیش آون والے معاملے توں عدالت نوں آگاہ کراں گے۔ انہاں آکھیا کہ لوکاں نوں امید اے کہ عدالتاں انصاف دی کوشش کر رہیاں نیں، بانی پی ٹی آئی نوں ریلیف وی عدالتاں توں ہی ملے گا تے ساڈی امید عدالتاں نال وابستہ اے۔
