آزاد کشمیر: طارق فاروق سپیکر، احمد رضا ڈپٹی سپیکر منتخب، شاہ غلام قادر وزیراعظم نامزد
مظفرآباد، لاہور، اسلام آباد آزاد کشمیر قانون ساز اسمبلی وچ مسلم لیگ ن دے نومنتخب ایم ایل اے طارق فاروق سپیکر، جدوں کہ احمد رضا قادری ڈپٹی سپیکر منتخب ہو گئے۔
دونیں نے اپنے عہدیاں دا حلف وی چُک لیا، دوجے پاسے مسلم لیگ ن نے شاہ غلام قادر نوں وزیراعظم لئی اپنا امیدوار نامزد کر دتا اے۔
تفصیلات مطابق آزاد کشمیر قانون ساز اسمبلی وچ سپیکر تے ڈپٹی سپیکر دے انتخاب لئی گزشتہ روز پولنگ دا عمل مکمل ہو گیا۔ نومنتخب ارکانِ اسمبلی نے ووٹنگ وچ حصہ لیا تے مسلم لیگ ن دے امیدوار طارق فاروق 32 ووٹ لے کے سپیکر، جدوں کہ احمد رضا قادری وی 32 ووٹ لے کے ڈپٹی سپیکر منتخب ہو گئے۔
انہاں دے مدمقابل پیپلزپارٹی دے سپیکر لئی امیدوار قاسم مجید نوں 14 ووٹ تے ڈپٹی سپیکر لئی عامر غفار نوں 13 ووٹ ملے، جدوں کہ اک ووٹ مسترد ہو گیا۔
بعد وچ اسمبلی سیکرٹریٹ وچ منعقدہ تقریب دوران نومنتخب سپیکر چودھری طارق فاروق تے ڈپٹی سپیکر احمد رضا قادری نے حلف چُکیا تے اپنی ذمہ داریاں وی سنبھال لیاں۔ حلف برداری دی تقریب وچ قانون ساز اسمبلی دے ارکان تے متعلقہ حکام نے شرکت کیتی۔
وزیراعلیٰ پنجاب مریم نواز نے مسلم لیگ ن دے سپیکر تے ڈپٹی سپیکر دے انتخاب اُتے اظہارِ تشکر کردیاں اپنے تہنیتی پیغام وچ طارق فاروق نوں سپیکر تے احمد رضا قادری نوں ڈپٹی سپیکر منتخب ہون اُتے مبارکباد دِتی۔
یاد رہے کہ اک روز پہلاں 46 نومنتخب ارکانِ اسمبلی نے حلف چُکیا سی۔
اُدھر ذرائع دے مطابق مسلم لیگ ن نے تین دہائیاں توں ودھ عرصے دا پارلیمانی تے انتخابی سیاست دا تجربہ رکھن والے مسلم لیگ ن آزاد کشمیر دے صدر شاہ غلام قادر نوں وزیراعظم آزاد کشمیر دے عہدے لئی نامزد کر دتا اے۔
ایہہ فیصلہ گزشتہ ہفتے رائے ونڈ وچ مسلم لیگ ن دے قائد نواز شریف دی زیرِ صدارت منعقدہ اہم مشاورتی اجلاس وچ کیتا گیا سی، جس وچ وزیراعظم شہباز شریف تے وزیراعلیٰ پنجاب مریم نواز وی موجود سن۔
شاہ غلام قادر کل جمعرات نوں آزاد جموں و کشمیر قانون ساز اسمبلی وچ قائدِ ایوان منتخب ہوون گے، جس توں بعد اوسے روز 27 اگست نوں شام 5 وجے ہائی کورٹ گراؤنڈ وچ نومنتخب وزیراعظم دی تقریبِ حلف برداری منعقد ہووے گی۔
واضح رہے کہ شاہ غلام قادر سات وار آزاد کشمیر اسمبلی دے رکن منتخب ہو چکے نیں، جدوں کہ 2006 تے 2016 وچ دو وار سپیکر وی رہ چکے نیں۔ ایس توں علاوہ اوہ وزیرِ خزانہ، منصوبہ بندی تے ترقی، خوراک تے اطلاعات سمیت مختلف اہم وزارتاں دے قلمدان وی سنبھال چکے نیں۔
