اجتماعی قیمتیں مقرر کرنا مسابقتی قانون دی خلاف ورزی: سپریم کورٹ
اسلام آباد (اے پی پی) سپریم کورٹ نے قرار دِتا اے کہ مسابقتی اداریاں ولوں اجتماعی طور اُتے قیمتاں مقرر کرنا، بھاویں قیمتاں وچ کمی ای کیوں نہ کیتی گئی ہووے، مسابقتی قانون دی خلاف ورزی اے۔ ہر کاروباری ادارے نوں اپنی قیمتاں آزادانہ طور اُتے مقرر کرنیاں پین گیاں۔
جسٹس جمال خان مندوخیل تے جسٹس صلاح الدین پنہور اُتے مشتمل دو رکنی بینچ نے پاکستان وناسپتی مینوفیکچررز ایسوسی ایشن دی اپیل اُتے فیصلہ جاری کر دِتا۔ عدالت نے قرار دِتا کہ حکومت دی درخواست اُتے گھی تے کوکنگ آئل دیاں قیمتاں گھٹ کرنا اپنے آپ وچ مسابقت مخالف عمل نہیں، پر مختلف مینوفیکچررز دی ایسوسی ایشن دے ذریعے اجتماعی طور اُتے قیمت طے کرنا آزادانہ مسابقت نوں متاثر کردا اے، ایس لئی قانون دے تحت ممنوع اے۔
فیصلے وچ آکھیا گیا اے کہ مسابقتی قانون دی دفعہ 4 دے تحت کوئی ایسوسی ایشن ایسا فیصلہ نہیں کر سکدی جس دا مقصد یا اثر متعلقہ مارکیٹ وچ مسابقت نوں روکنا، محدود کرنا یا گھٹ کرنا ہووے۔ قیمتاں دا اجتماعی تعین وی ایسے زمرے وچ آندا اے۔
سپریم کورٹ نے قرار دِتا کہ موجودہ معاملے وچ ایسوسی ایشن دا اقدام خفیہ ملی بھگت یا پوشیدہ کارٹیل دا نتیجہ نہیں سی۔ قیمتاں وچ کمی دی گل وی وفاقی حکومت ولوں شروع کیتی گئی سی، ایس لئی 5 کروڑ روپے دا جرمانہ حالات دے مطابق زیادہ اے۔
عدالت نے پاکستان وناسپتی مینوفیکچررز ایسوسی ایشن دی اپیل جزوی طور اُتے منظور کردیاں مسابقتی کمیشن تے اپیلٹ ٹربیونل ولوں خلاف ورزی بارے دِتا گیا فیصلہ برقرار رکھیا، تاہم 5 کروڑ روپے دا جرمانہ گھٹا کے 3 کروڑ روپے کر دِتا۔
