چینی ڈیری کمپنی دا دورہ، پنجاب وچ پراسیسنگ پراجیکٹ قائم کرنا چاہندے نیں: مریم نواز

وزیراعلیٰ پنجاب دی پولیٹیکل کمشنر ہی ژونگ یو نال وی ملاقات، شین جیانگ نال مختلف شعبیاں وچ تعاون ودھاؤن اُتے اتفاق

لاہور: وزیراعلیٰ پنجاب مریم نواز شریف نے دورۂ چین دوران سنکیانگ وچ معروف ٹائرن وزڈم ڈیری کمپنی دے ہیڈکوارٹر دا دورہ کیتا، جتھے انتظامیہ نے وزیراعلیٰ تے انہاں دے وفد دا پرتپاک خیرمقدم کیتا۔

مریم نواز شریف نے آکھیا کہ چین دے اشتراک نال پنجاب وچ ملک تے ڈیری پراسیسنگ پراجیکٹ قائم کرنا چاہندے آں۔ پنجاب وچ لائیو سٹاک دی بہتری تے فروغ دے منصوبے نتیجہ خیز ثابت ہو رہے نیں، جدکہ دیہی خواتین دی مالی خودمختاری تے مویشیاں دی افزائش نسل لئی وی خصوصی منصوبے جاری نیں۔

وزیراعلیٰ نے ٹائرن وزڈم ڈیری کمپنی دے مختلف شعبیاں دا دورہ کرکے جدید ڈیری فارمنگ تے ملک پروسیسنگ دے نظام دا جائزہ لیا۔ ماہرین نے انہاں نوں دودھ دی پروسیسنگ، دہی تے ہور ڈیری مصنوعات دی تیاری دے مختلف مراحل بارے بریفنگ دِتی۔

مریم نواز شریف نے شین جیانگ وایغور خودمختار علاقائی کمیٹی تے پارٹی سیکرٹری، پروڈکشن اینڈ کنسٹرکشن کورپس دے پولیٹیکل کمشنر ہی ژونگ یو نال وی ملاقات کیتی۔ ملاقات وچ پنجاب تے شین جیانگ دے درمیان اقتصادی، زرعی، صنعتی تے تکنیکی تعاون نوں ہور وسعت دین اُتے تفصیلی گل بات ہوئی۔

دونواں پاسیاں نے زراعت، صنعت، ٹیکنالوجی تے بنیادی ڈھانچے دے شعبیاں وچ تعاون ودھاؤن دے عزم دا اظہار کیتا۔ مریم نواز نے پانی دی کمی والے علاقیاں وچ زرعی پیداوار بہتر کرن لئی چین دے تجربیاں توں فائدہ چکّن دی پیشکش وی کیتی۔

وزیراعلیٰ نے آکھیا کہ واٹر ایفیشنٹ ٹیکنالوجی، ڈرپ اریگیشن تے معیاری بیج دے استعمال نال گھٹ پانی والے علاقیاں وچ وی بہتر فصل حاصل کیتی جا سکدی اے۔ انہاں نے پنجاب تے شین جیانگ وچ باہمی اشتراک نوں فروغ دین اُتے زور دِتا۔

دوجے پاسے گوانگیانگ وچ حکومت پنجاب تے چین دے صوبہ گوئیژو دی حکومت دے اشتراک نال بزنس اینڈ انویسٹمنٹ کانفرنس دا انعقاد وی ہویا، جتھے چینی کمپنیواں دے اعلیٰ حکام تے سرمایہ کاراں نے شرکت کیتی۔ چینی سرمایہ کاراں نوں پنجاب وچ قائم مختلف خصوصی اقتصادی زونز دا دورہ کرن دی دعوت دِتی گئی۔

وزیر زراعت پنجاب عاشق کرمانی نے کانفرنس دوران چینی کمپنیواں تے کاروباری وفود نال ملاقاتاں کیتیاں تے پنجاب نوں چین لئی بہترین مینوفیکچرنگ ہب بنن دی صلاحیت رکھنے والا خطہ قرار دِتا۔

ادھر سوئٹزرلینڈ دی ماحولیاتی تحفظ نال متعلق عالمی تنظیم فاؤنڈیشن ’نوبل سسٹین ایبلٹی ٹرسٹ‘ نے مریم نواز شریف دیاں ماحولیاتی بہتری تے ٹیکنالوجی بیسڈ گورننس لئی کیتے اقدامات نوں سراہیا۔ فاؤنڈیشن دے چیئرمین پیٹر نوبل نے وزیراعلیٰ پنجاب نوں 30 ستمبر نوں ہانگ کانگ وچ ہون والے عالمی لیڈرشپ سمٹ تے این ایس ٹی ایوارڈ گالا وچ شرکت دی باضابطہ دعوت دِتی۔