کراچی :K الیکٹرک دا ناقص نظام، اک دن وچ 6موتاں
کراچی: کراچی وچ کے الیکٹرک دے ناقص نظام دی وجہ توں تاراں ٹُٹن پاروں کرنٹ لگن نال اک ای دن وچ 6بندے جاں بحق ہو گئے نیں۔ ناگن چورنگی دے نیڑے دس سالہ احمد رضا کرنٹ لگن نال جاں بحق ہویا جد کہ ایسے علاقے وچ نجی بینک دے نیڑے کرنٹ لگن نال 30سالہ شخص وی دم توڑ گیا۔ ایہدے علاوہ کریم آباد دارالسلام مسجد دے نیڑے کم دے دوران کرنٹ لگن نال 49سالہ مرزا رحمان نامی شہری جان دی بازی ہار گیا۔ ہجرت کالونی تے ماڈل کالونی وچ گھراں وچ کرنٹ لگن نال دو بندے جاں بحق ہو گئے۔ کارساز روڈ تے پیر پگاڑا ہاؤس دے نیڑے بجلی دے تار ٹُٹن دی وجہ توں کرنٹ لگن نال موٹرسائیکل سوار دی جان چلی گئی۔ صوبائی وزیر توانائی امتیاز شیخ نے بارشاں دے نتیجے وچ کرنٹ لگن نال ہلاکتاں تے نوٹس لیندیاں سیکرٹری پاور ڈویژن چیئرمین نیپرا تے ایم ڈی کے الیکٹراک نال رابطہ کیتا اے۔ امتیاز شیخ نے کرنٹ نال شہریاں دی ہلاکت تے دکھ تے افسوس دا اظہار کردیاں ہدایت کیتی اے کہ ذمہ داراں دا تعین کرکے سخت ایکشن لیا جائے۔
