نواز شریف نے افتخار گیلانی نوں وزیراعظم آزاد کشمیر نامزد کر دِتا، اج انتخاب: شاہ غلام قادر، فاروق حیدر دے تحفظات

مشاورت توں بعد نواز شریف نے منظوری دِتی، مریم اورنگزیب، سردار مختار پیپلز پارٹی دے امیدوار ہون گے، افتخار گیلانی نوں ووٹ نہیں دیواں گے تے اج اسمبلی اجلاس وچ وی شرکت نہیں کراں گے: صدر ن لیگ، سابق وزیراعظم دا اعلان

مظفرآباد (محمد اسلم میر): مسلم لیگ (ن) دے صدر محمد نواز شریف نے بیرسٹر سید افتخار علی گیلانی نوں وزیراعظم آزاد جموں و کشمیر بناؤن دی منظوری دے دِتی تے انہاں نوں وزارتِ عظمیٰ دے انتخاب لئی کاغذاتِ نامزدگی وی جمع کراؤن دی ہدایت کر دِتی۔

صدر ن لیگ شاہ غلام قادر تے سابق وزیراعظم راجہ فاروق حیدر نے تحفظات دا اظہار کردیاں فیصلہ مسترد کر دِتا تے اج قانون ساز اسمبلی دے اجلاس وچ وی شرکت نہ کرن دا اعلان کیتا۔ نئے قائدِ ایوان دے انتخاب لئی قانون ساز اسمبلی دا اجلاس اج ہووے گا۔

کاغذاتِ نامزدگی صبح 9:30 توں 10:30 وجے تک جمع کرائے جا سکن گے، جدویں جانچ پڑتال 10:30 توں 10:45 وجے تک ہووے گی۔ امیدواراں دی حتمی فہرست دوپہر 12 وجے آویزاں کیتی جاوے گی تے وزیراعظم دا انتخاب نمازِ جمعہ توں بعد دو وجے ہووے گا۔

پاکستان پیپلز پارٹی ولوں سردار مختار احمد خان نوں وزیراعظم دے امیدوار دے طور اُتے نامزد کیتا گیا۔

مسلم لیگ (ن) دی مرکزی سیکرٹری اطلاعات مریم اورنگزیب دے مطابق آزاد کشمیر وچ حکومت سازی بارے وزیراعظم ہاؤس وچ اہم مشاورت مکمل کر لئی گئی اے۔

وزیراعظم شہباز شریف دی زیرِ صدارت اجلاس وچ آزاد کشمیر وچ حکومت سازی، وزیراعظم دے انتخاب، نئی کابینہ دی تشکیل، حکومتی ترجیحات، گڈ گورننس تے حکومتی امور بہتر بناؤن لئی اقدامات اُتے تفصیلی غور کیتا گیا۔

اجلاس وچ رانا ثناء اللہ، خواجہ سعد رفیق، شاہ غلام قادر، راجہ فاروق حیدر، طارق فاروق، احمد رضا قادری تے بیرسٹر افتخار گیلانی نے شرکت کیتی۔ اجلاس وچ آئندہ دی پارلیمانی حکمتِ عملی تے حکومت سازی دے لائحہ عمل نوں حتمی شکل دین اُتے وی مشاورت کیتی گئی، جس توں بعد نئے قائدِ ایوان دے ناں دی منظوری دِتی گئی۔

دوجے پاسے مسلم لیگ (ن) آزاد کشمیر دے صدر شاہ غلام قادر تے سابق وزیراعظم راجہ فاروق حیدر نے تحفظات دا اظہار کردیاں بیرسٹر افتخار گیلانی نوں وزیراعظم نامزد کرن دے فیصلے نوں مسترد کر دِتا۔ انہاں واضح کیتا کہ اوہ افتخار گیلانی نوں ووٹ نہیں دیواں گے تے نہ ای وزیراعظم دے انتخاب لئی قانون ساز اسمبلی دے اجلاس وچ شرکت کرن گے۔

پارٹی ذرائع دے مطابق شاہ غلام قادر نے بیرسٹر افتخار گیلانی نوں وزارتِ عظمیٰ لئی قابلِ قبول نہ ہون تے انہاں دی نامزدگی اُتے شدید تحفظات دا اظہار کیتا اے۔ ذرائع دا کہنا اے کہ شاہ غلام قادر تے سابق وزیراعظم راجہ فاروق حیدر نے وزیراعظم ہاؤس وچ ہون والے اجلاس دوران وی افتخار گیلانی نوں وزیراعظم بناؤن دے فیصلے نال اتفاق نہیں کیتا تے اپنا مؤقف واضح طور اُتے پیش کیتا۔

شاہ غلام قادر دا کہنا اے کہ آزاد کشمیر دے عوام نے مسلم لیگ (ن) نوں مینڈیٹ دِتا اے، جس دا ہر سطح اُتے احترام ضروری اے۔ عوام دی عزت، رائے تے وقار اُتے کوئی سمجھوتا نہیں کیتا جاوے گا تے نواز شریف دے ”ووٹ نوں عزت دو” دے بیانیے نوں مقدم رکھیا جاوے گا۔

انہاں آکھیا کہ پارٹی کارکنان تے سینئر قیادت نال مشاورت توں بعد آئندہ دا سیاسی لائحہ عمل طے کیتا جاوے گا۔