حکومت دا 15ستمبر توں پورے ملک اندر تعلیمی ادارے کھولن دا اعلان

اسلام آباد: وفاقی حکومت نے 15ستمبر توں پورے ملک اندر تعلیمی ادارے کھولن دا اعلان کر دتا،اسلام آباداندر پریس کانفرنس دے دوران ملک بھر اندر وفاقی وزیر تعلیم شفقت محمود نے آکھیا کہ کورونا دی صورتحال وچ تعلیم دا بوہت وڈا نقصان ہوئیا اے ، اساںجو اجلاس کیتے اوہناں اندر اسکول کھولن سمیت ہور امور زیر غور سن ، ملک اندر تعلیمی ادارے 15ستمبر نوں کھولن دا فیصلہ کیتا گیا اے ، اگست دے پہلے تے تیسرے ہفتے فیصلے اُتے نظر ثانی کراں گے ، ستمبر دے پہلے ہفتے وچ دوبارہ سخت دے ایڈیکیٹرز نوں مدنظر رکھیا جائے گا ، معاملات ٹھیک ہو جاون تے فیر 15ستمبر توں تعلیمی ادارے کھول دیا ں گے ،وفاقی وزیر تعلیم نے آکھیا کہ فیصلہ ہویا اے کہ مختلف تعلیمی ادارایاں نوں انتظامی دفتر پہلاں کھولن دی اجازت دتی جائے ۔ وڈی عید تو بعد یا اگست دے شروع وچ اسکول ، کالجز، یونیورسٹیاں ، اساتذہ تے عملے نوں بلا سکاں گے تے حفاظتی انتظامات دی پریکٹس دتی جائے گی ،ایس حوالے نال کسی تریخ یا ٹائم دے تعین دا اختیار صوبیاں کول اے ،شفقت محمود نے آکھیا کہ 13مارچ تو ں بعد امتحانات روک دتے گئے سن تاہم ہن جیہڑے ادارے امتحانات لینا چاہندے نیں اوہ جولائی دے دوسرے ہفتے توں ایس طرح کر سکدے نیں ، یونیورسٹیاں اندر داخلے لئی ہون والے امتحانات نوں دو روز توں محیط کرن دی ہدایت کیتی گئی اے تاکہ رش نہ پئے ، امتحانات کھلے میدان اندر ہوون گے ، طلبہ دا درمیانی فاصلہ 6فٹ ہوئے گا ، امتحانات دی نگرانی کیتی جائے گی ایس او پیز اُتے عمل نہ ہوون تے امتحان روک دتا جائے گا۔