مریم نواز دا پنجاب دا پہلا سپیشل ڈیٹا سنٹر بناؤن دا اعلان، چینی کمپنیوں نوں سرمایہ کاری دی دعوت
پنجاب نوں مصنوعی ذہانت (AI) دے میدان وچ اگے لے کے جانا اولین ترجیح: بگ ڈیٹا انڈسٹری ایکسپو 2026 توں خطاب
وزیراعلیٰ دی ٹیکنالوجی کمپنی ہواوے دی انتظامیہ نال ملاقات، مختلف تجاویز اُتے غور، نیپال وچ سیلاب نال تباہی اُتے افسوس
لاہور (مانیٹرنگ ڈیسک) وزیراعلیٰ پنجاب مریم نواز شریف نے پنجاب دا پہلا سپیشل ڈیٹا سنٹر پنجاب ڈیٹا لیک متعارف کراؤن دا اعلان کردیاں چینی ٹیکنالوجی کمپنیوں، سرمایہ کاراں تے انفراسٹرکچر دے قائدین نوں پنجاب وچ سرمایہ کاری دی دعوت دِتی اے۔
چین دے دورے اُتے موجود وزیراعلیٰ پنجاب مریم نواز نے بگ ڈیٹا انڈسٹری ایکسپو 2026 توں خطاب کردیاں آکھیا کہ نظام دے مرکز وچ ریاستی سطح دا اک مشترکہ ڈیٹا انجن موجود اے، جِنوں ون میپ (OneMap) آکھیا جاندا اے۔ ایس دے ذریعے منصوبہ بندی، زمین نال متعلق تنازعات دے حل تے ہور دانشمندانہ شہری ترقی وچ مدد حاصل کیتی جاسکدی اے۔
اُنہاں آکھیا کہ ون میپ دے مربوط نظام دے ذریعے حکومت اپنے شہریاں دیاں ضروریات نوں ہور بہتر انداز وچ سمجھ سکے گی۔ انہاں سارے نظاماں دے پچھے حکومت ہور نظاماں دے نال نال پنجاب ڈیٹا لیک وی تیار کر رہی اے۔
وزیراعلیٰ نے آکھیا کہ پنجاب پاکستان دا سب توں زیادہ مصنوعی ذہانت (AI) توں فائدہ لین والا صوبہ اے۔ حکومت اک خودمختار کلاؤڈ، ڈیجیٹل شناخت، باہمی طور اُتے مربوط حکومتی نظام تے مصنوعی ذہانت اُتے مبنی عمل درآمد دا نظام وی تشکیل دے رہی اے۔
مریم نواز نے آکھیا کہ پنجاب پہلا صوبہ اے جِنہوں اپنا مخصوص AI Office قائم کیتا اے۔ پنجاب نوں مصنوعی ذہانت دے میدان وچ اگے لے کے جانا اولین ترجیح اے، جدویں پنجاب وچ چینی کمپنیواں لئی بے پناہ مواقع موجود نیں۔
ہواوے دی انتظامیہ نال ملاقات
دریں اثنا وزیراعلیٰ پنجاب مریم نواز نے وفد دے ہمراہ معروف چینی ٹیکنالوجی کمپنی ہواوے (Huawei) دی انتظامیہ نال وی ملاقات کیتی۔ ایس موقعے اُتے سمارٹ سٹی، کمانڈ سنٹر، ہیلتھ کیئر، تعلیم، زراعت تے مینوفیکچرنگ سیکٹر وچ ہواوے دے اشتراک دا خیرمقدم کیتا گیا۔
وزیراعلیٰ نے کمپنی نوں نواز شریف آئی ٹی سٹی وچ سرمایہ کاری دی دعوت دِتی۔ ملاقات وچ پنجاب دے ۱۰۰۰ نوجواناں نوں ہواوے ماسٹر ٹرینر دے طور اُتے تربیت دین اُتے اتفاق ہویا۔ پنجاب دیاں ۳۰۰ خواتین ٹرینرز نوں وی ہواوے ولوں اے آئی ٹریننگ دِتی جاوے گی۔
ایس موقعے اُتے مریم نواز نے آکھیا کہ پنجاب حکومت کارکردگی، شفافیت، فیصلہ سازی، شہریاں نوں خدمات دی فراہمی دے معیار تے ٹیکنالوجی دے بھرپور استعمال نوں یقینی بنا رہی اے۔ پنجاب وچ کلاؤڈ کمپیوٹنگ، ڈیجیٹل انفراسٹرکچر تے مقامی اے آئی ماڈلز تیار کیتے جان گے۔
ہواوے دے سینئر ایگزیکٹو نے آکھیا کہ ڈیجیٹل تبدیلی تے پائیدار ترقی نوں اگے ودھاؤن لئی ہواوے پنجاب دے نال کم جاری رکھے گا۔
افتخار گیلانی نوں مبارکباد
دوجے پاسے مریم نواز شریف نے بیرسٹر افتخار گیلانی نوں آزاد جموں و کشمیر دا وزیراعظم منتخب ہون اُتے مبارکباد دِتی۔ اپنے تہنیتی پیغام وچ اُنہاں آکھیا کہ آزاد جموں و کشمیر وچ ترقی تے خوشحالی دا دور شروع ہو رہیا اے۔
نیپال وچ سیلاب اُتے افسوس
دوجے پاسے وزیراعلیٰ پنجاب نے نیپال وچ تباہ کن سیلاب دے باعث قیمتی انسانی جاناں تے املاک دے نقصان اُتے افسوس دا اظہار کیتا۔
اپنے تعزیتی بیان وچ اُنہاں آکھیا کہ انسانی ہمدردی دے تحت پنجاب حکومت نیپال دی حکومت نال ہر ممکن تعاون لئی تیار اے۔
