عوام دے صبر دا پیمانہ لبریز، اسلام آباد ول مارچ کراں گے: حافظ نعیم
کوئٹہ وچ کل توں دھرنے دا آغاز، بجلی دی پیداوار دی صلاحیت دگنی فیر وی کیپسٹی پیمنٹس وصولی، لوڈشیڈنگ کیوں؟ حافظ نعیم
ملک وچ اک چھوٹے طبقے لئی ساریاں مراعات، مریم نواز دی حکومت نے پنجاب نوں برباد کر دِتا اے: امیر جماعتِ اسلامی
لاہور، فیصل آباد (سیاسی نمائندہ، سٹی رپورٹر) جماعتِ اسلامی دے امیر حافظ نعیم الرحمٰن نے حکومت اُتے عوامی مسئلے توں چشم پوشی تے اشرافیہ نوں مراعات دین دا الزام لاندیاں آکھیا اے کہ ملک وچ جاری احتجاجی تحریک ہُن نہیں رکے گی، حکومت نوں عوام نوں ریلیف دینا پئے گا۔
لاہور وچ پریس کانفرنس نوں خطاب کردیاں حافظ نعیم الرحمٰن نے آکھیا کہ جماعتِ اسلامی کل توں کوئٹہ وچ وی دھرنا شروع کرے گی۔ اُنہاں آکھیا کہ عوام دے صبر دا پیمانہ لبریز ہو چکیا اے، حکمراناں کول عوامی مطالبے تسلیم کرن توں علاوہ ہُن کوئی راستہ نہیں۔
اُنہاں مطالبہ کیتا کہ پٹرولیم لیوی ختم کیتی جائے، بجلی تے روٹی دیاں قیمتیں گھٹائیاں جان۔ اُنہاں اعلان کیتا کہ ۳ ستمبر نوں ملک گیر ہڑتال کیتی جاوے گی تے اسلام آباد ول لانگ مارچ وی کیتا جاوے گا۔ کوئٹہ وچ کل توں دھرنے دا آغاز ہوئے گا، جدویں راولپنڈی، پشاور تے کراچی وچ وڈے جلسے کیتے جان گے۔
حافظ نعیم نے آکھیا کہ ملک وچ بجلی پیدا کرن دی صلاحیت دگنی ہو چکی اے، ایس دے باوجود عوام توں کیپسٹی پیمنٹس وصول کیتیاں جا رہیاں نیں تے لوڈشیڈنگ عروج اُتے اے۔
اُنہاں آکھیا کہ ملک وچ اک چھوٹے طبقے نوں ساریاں مراعات حاصل نیں۔
فیصل آباد وچ جماعتِ اسلامی دے دھرنے دے مقام اُتے جلسہ عام نوں خطاب کردیاں نعیم الرحمٰن نے آکھیا کہ وزیراعلیٰ پنجاب مریم نواز دی حکومت نے پنجاب نوں برباد کر دِتا اے، جدویں وزیراعظم شہباز شریف دیاں پالیسیاں عوام نوں بے وقوف بناؤن توں علاوہ کجھ نہیں کر رہیاں۔
پمز ہسپتال دے حالیہ واقعے دا حوالہ دیندیاں اُنہاں آکھیا کہ جے اسلام آباد دے ہسپتال دا ایہہ حال اے تاں باقی شہراں دے سرکاری ہسپتالاں دی صورتحال دا اندازہ لایا جاسکدا اے۔
اُنہاں آکھیا کہ مصنوعی ذہانت دے دور وچ دنیا اگے ودھ رہی اے، پر پاکستان وچ ڈیٹا سنٹرز تک نہیں بن رہے۔ جے نوجواناں نوں مواقع تے درست سمت فراہم کیتی جائے تاں ایہی نوجوان پاکستان نوں امریکا تے یورپ دا مقابلہ کرن دے قابل بنا سکدے نیں۔
حافظ نعیم نے آکھیا کہ عدالتاں وچ ۲۴ لاکھ مقدمے زیرِ التوا نیں تے جج چھٹیاں اُتے نیں۔ اُنہاں عوام دے مینڈیٹ دا احترام کرن تے سارے سیاسی قیدیاں دی رہائی دا مطالبہ وی کیتا۔
