توانائی دے مسئلے نال متعلق سندھ حکومت تے وفاق دا جائزہ اجلاس

نویں گیس کنکشناں لئی صوبے دی نوٹیفائیڈ فہرست اپ ڈیٹ کیتی جائے: مراد علی شاہ

صوبے دے نال رل کے کم کراں گے: علی پرویز ملک، شزا فاطمہ وی وزیراعلیٰ نال ملے

کراچی (سٹاف رپورٹر) وزیراعلیٰ سندھ سید مراد علی شاہ تے وفاقی وزیرِ توانائی (پٹرولیم ڈویژن) علی پرویز ملک نے سندھ نوں درپیش توانائی دے مسئلے حل کرن لئی اہم امور دا جائزہ لیا۔

اجلاس وچ سندھ انرجی ہولڈنگ کمپنی لمیٹڈ نوں ہڈن بلاک دا اجرا، متروک تے غیر فعال گیس فیلڈز دی الاٹمنٹ، سوہو تے کندھکوٹ فیلڈز توں گیس دی فراہمی تے سوئی سدرن گیس کمپنی نال متعلق زیرِ التوا معاملات اُتے غور کیتا گیا۔

وزیراعلیٰ نے آکھیا کہ سندھ دیاں صنعتاں توانائی دی شدید قلت دا سامنا کر رہیاں نیں۔ متروک تے غیر فعال گیس فیلڈز صوبے نوں صنعتی استعمال لئی الاٹ کرن نال صنعتاں نوں فوری ریلیف تے روزگار دے مواقع پیدا ہوسکدے نیں۔

وزیراعلیٰ نے ہڈن بلاک (2767-3) دا معاملہ چکدیاں آکھیا کہ سندھ انرجی ہولڈنگ کمپنی نے مشترکہ مفادات کونسل دے فیصلے تے پٹرولیم ایکسپلوریشن اینڈ پروڈکشن پالیسی 2012 دے تحت فروری 2025 وچ درخواست جمع کرائی سی، تاہم کئی وار خط و کتابت دے باوجود معاملہ ہُن تک زیرِ التوا اے۔

مراد علی شاہ نے آکھیا کہ سندھ ساریاں قانونی تے ضابطے دیاں ضروریات پوری کر چکیا اے تے موجودہ پالیسی فریم ورک دے تحت بلاک حاصل کرن دا حق رکھدا اے۔

اجلاس وچ سوئی سدرن گیس کمپنی نال متعلق کراچی دے گڈاپ وچ سرکاری اراضی کمپنی نوں خدیجی بیس کیمپ قائم کرن لئی لیز اُتے دین تے نویں گیس کنکشناں لئی سندھ دے دیہی تے شہری علاقیاں دی نوٹیفائیڈ فہرست اپ ڈیٹ کرن دے امور دا وی جائزہ لیا گیا۔

وفاقی وزیرِ توانائی علی پرویز ملک نے سندھ حکومت دے مسئلیاں دی اہمیت نوں تسلیم کردیاں آکھیا کہ پٹرولیم ڈویژن ہر تجویز دا بغور جائزہ لے گا تے عملی تے باہمی طور اُتے فائدہ مند حل لئی صوبائی حکومت دے نال رل کے کم کرے گا۔

شزا فاطمہ دی وزیراعلیٰ سندھ نال ملاقات

دریں اثنا وزیراعلیٰ سندھ سید مراد علی شاہ نال وفاقی وزیرِ آئی ٹی شزا فاطمہ خواجہ نے وی ملاقات کیتی۔ ملاقات وچ ڈیجیٹل نیشن پاکستان فریم ورک، نیشنل ڈیجیٹل کمیشن، نیشنل ڈیجیٹل ماسٹر پلان، ڈیٹا گورننس، مصنوعی ذہانت تے سندھ دے ڈیجیٹل اقدامات نوں قومی ڈیجیٹل ایجنڈے نال ہم آہنگ کرن اُتے تبادلہ خیال کیتا گیا۔