سندھ طاس معاہدہ علاقائی سلامتی کیلئے انتہائی اہم:اسحاق ڈار
- اسلام آباد، لندن (مانیٹرنگ ڈیسک): نائب وزیراعظم تے وزیر خارجہ اسحاق ڈار نے آکھیا اے کہ سندھ طاس صرف اک معاہدہ نئیں بلکہ اک قانونی فریم ورک اے، جیہڑا علاقائی سلامتی لئی انتہائی اہم اے۔
- پاکستانی سفارتخانے واشنگٹن وچ سندھ طاس معاہدے اُتے سیمینار نوں خطاب کردیاں اوہناں آکھیا کہ ریاستاں دے درمیان پانی دی تقسیم عالمی قوانین دے تحت ہی ممکن اے۔
- اوہناں آکھیا کہ عالمی بینک سندھ طاس معاہدے دا ثالث اے۔ معاہدے دے تحت دریائے راوی، بیاس تے ستلج دا پانی بھارت بغیر پابندی دے استعمال کر سکدا اے، ایس طرح پاکستان دریائے سندھ، جہلم تے چناب دا پانی بغیر کسے پابندی دے استعمال کر سکدا اے۔
- دونوں ملکاں دے درمیان دریاؤں دے معاملے اُتے انڈس کمیشن وی فعال اے تے پانی دے تنازعے دے حل لئی معاہدے وچ میکنزم موجود اے۔
- اسحاق ڈار نے آکھیا کہ بھارت نے جان بوجھ کے سندھ طاس معاہدہ یکطرفہ طور اُتے معطل کیتا، جدویں کہ پاکستان لئی آبی تحفظ معاشی، غذائی تے قومی سلامتی نال جڑیا ہویا اے۔
- اوہناں آکھیا کہ پاکستان اختلافات دے حل لئی مذاکرات تے سفارتکاری دا حامی اے، پر اپنے آبی حقوق دے تحفظ لئی وی پُرعزم اے۔
- دریں اثنا لندن وچ میڈیا نال گل کردیاں اسحاق ڈار نے آکھیا کہ دورہ برطانیہ کامیاب رہیا۔ دورے دے اہم ایجنڈا آئٹمز اُتے تفصیلی گل بات ہوئی تے پاکستان سفارتی طور اُتے پہلے نالوں کہیں بہتر مقام اُتے اے۔
- اوہناں آکھیا کہ بحری کارکنان دی رہائی لئی عالمی اصولاں دے تحت حکمت عملی اپنائی گئی۔
- علاوہ ازیں اسحاق ڈار نے سعودی عرب تے ترکیہ دے وزرائے خارجہ شہزادہ فیصل بن فرحان آل سعود تے حاقان فیدان نال وکھ وکھ ٹیلیفونک گل بات کیتی، جس وچ خطے دی بدل دی صورتحال، باہمی دلچسپی دے امور تے آئندہ ہون والے آر فور اجلاس سمیت اہم سفارتی معاملات اُتے تبادلہ خیال کیتا گیا۔
- وزارت خارجہ دے مطابق اسحاق ڈار نے سعودی وزیر خارجہ نال گل بات دوران موریطانیہ دے اسماعیل ولد شیخ احمد دے اتفاقِ رائے نال اسلامی تعاون تنظیم (او آئی سی) دا نواں سیکرٹری جنرل منتخب ہون اُتے انہاں نوں مبارکباد دِتی۔
- بعد ازاں نائب وزیراعظم نے ترکیہ دے وزیر خارجہ حاقان فیدان نال وی ٹیلیفونک گل بات کیتی۔ دونوں رہنماؤں نے خطے دی بدل دی صورتحال، مشترکہ دلچسپی دے امور تے آئندہ سفارتی روابط اُتے تبادلہ خیال کیتا
