معاشی استحکام توں پائیدار ترقی ول ودھن دا ویلا آ گیا، احسن اقبال
اسلام آباد (این این آئی): وفاقی وزیر منصوبہ بندی تے ترقی احسن اقبال نے آکھیا اے کہ پاکستان نوں معاشی استحکام توں اگے ودھ کے پائیدار اقتصادی ترقی، پیداوار وچ اضافے، برآمدات دے فروغ، سرمایہ کاری تے روزگار دے وسیع مواقع ول ودھنا ہووے گا۔ بنیادی چیلنج معیشت وچ ایسی مستقل تبدیلی لیانا اے، جس نال بار بار آؤن والے معاشی بحراناں دے چکر توں نجات حاصل کیتی جا سکے۔
وزارتِ منصوبہ بندی وچ ہارورڈ بزنس سکول دے ایم بی اے طلبہ نال گفتگو کردیاں اوہناں آکھیا کہ پاکستان دی وڈی نوجوان آبادی، جغرافیائی محلِ وقوع، زرعی تے معدنی وسائل تے تیزی نال وسعت پذیر ڈیجیٹل معیشت طویل المدت ترقی لئی مضبوط بنیاد نیں۔ حکومت نے 2035 تک اک کھرب ڈالر دی معیشت دا ہدف مقرر کیتا اے۔
تاہم حقیقی مقصد قومی پیداواری صلاحیت نوں ودھانا تے عالمی منڈی لئی مسابقتی مصنوعات تے خدمات تیار کرنا اے۔
احسن اقبال نے آکھیا کہ پیداوار، معیار تے جدت مستقبل دی مسابقتی صلاحیت دے بنیادی عناصر نیں۔ نوجواناں نوں تعلیم، ہنر تے روزگار دے مواقع دے کے معاشی تبدیلی دا شراکت دار بنانا ہووے گا۔ نوجواناں نوں معیاری تعلیم، فنی مہارت تے روزگار دے مواقع فراہم کرنا ناگزیر اے۔
اوہناں آکھیا کہ مصنوعی ذہانت تے ہور جدید ٹیکنالوجیز وچ پاکستان نوں محض صارف دی بجائے تخلیق کار بننا ہووے گا۔
اوہناں آکھیا کہ قومی معاشی تبدیلی صرف حکومت نئیں کر سکدی، نجی شعبے نوں وی سرمایہ کاری، کاروبار تے جدت وچ قائدانہ کردار ادا کرنا ہووے گا۔ پالیسیواں دا تسلسل ترقی دی بنیادی شرط اے۔
