3 سال توں زیرِ التوا مقدمات 2 مہینیاں وچ نمٹاؤن لئی پراسیکیوشن متحرک
لاہور (کورٹ رپورٹر): پراسیکیوشن ڈیپارٹمنٹ پنجاب نے تین سال توں زیرِ التوا مقدمات نوں لاہور ہائیکورٹ دے دو مہینیاں وچ نمٹاؤن دے حکم اُتے عملدرآمد لئی اقدامات شروع کر دِتے نیں۔
ایس حوالے نال پراسیکیوٹر جنرل پنجاب عرفان صادق تارڑ دی سربراہی وچ پبلک پراسیکیوٹرز دا ویڈیو لنک اجلاس ہویا، جس وچ تین سال توں زیرِ التوا مقدمات دا جائزہ لیا گیا۔
عرفان صادق تارڑ نے سارے پراسیکیوٹرز نوں عدالتاں وچ حاضری یقینی بناؤن تے مقدمات دی مؤثر پیروی دی ہدایت کیتی، جدویں کہ تین دناں دے اندر تین سال توں زیرِ التوا مقدمات دا مکمل ڈیٹا وی طلب کر لیا گیا۔
ایس موقع اُتے اجلاس نوں خطاب کردیاں اوہناں آکھیا کہ چیف جسٹس عالیہ نیلم دے حکم اُتے پنجاب دیاں ماتحت عدالتاں وچ تین سال توں زیرِ التوا مقدمات نوں دو مہینیاں وچ نمٹاؤن لئی خصوصی پراسیکیوٹرز تعینات کیتے جان گے۔ مقدمات وچ غیر ضروری تاخیر برداشت نئیں کیتی جاوے گی۔
پراسیکیوٹر جنرل پنجاب عرفان صادق تارڑ نے دنیا نیوز نال خصوصی گفتگو کردیاں آکھیا کہ چیف جسٹس لاہور ہائیکورٹ دے حکم اُتے من و عن عمل کیتا جاوے گا۔
