سپریم کورٹ: 27ویں آئینی ترمیم خلاف درخواست لین توں انکار

اسلام آباد (کورٹ رپورٹر): سپریم کورٹ رجسٹرار آفس نے ستائیسویں آئینی ترمیم خلاف درخواست وصول کرن توں انکار کر دِتا اے۔ رجسٹرار آفس دا موقف اے کہ ایس نوعیت دیاں درخواستاں وفاقی آئینی عدالت وچ دائر کیتیاں جا سکدیاں نیں۔

ستائیسویں ترمیم جسٹس (ر) شبر رضا رضوی ولوں چیلنج کیتی گئی سی۔ درخواست وچ موقف اختیار کیتا گیا کہ آئین پاکستان قانون ساز اسمبلی نے تشکیل دِتا سی تے قانون ساز اسمبلی نے 1973 دے آئین وچ سپریم کورٹ نوں اعلیٰ ترین عدالت قرار دِتا سی، جدویں کہ موجودہ اسمبلی کسے صورت دستور ساز اسمبلی نئیں اے۔

درخواست وچ آکھیا گیا کہ آئین دے بنیادی خدوخال نوں تبدیل نئیں کیتا جا سکدا۔ اسلامی ریاست وچ کسے نوں تاحیات استثنیٰ نئیں دِتا جا سکدا، جدویں کہ عدلیہ دی آزادی دا براہِ راست تعلق ججز دی تعیناتی نال اے۔

درخواست گزار نے موقف اختیار کیتا کہ ستائیسویں ترمیم وچ اصل وچ آئین دی خلاف ورزی کیتی گئی اے۔ استدعا کیتی گئی کہ سپریم کورٹ ستائیسویں آئینی ترمیم نوں کالعدم قرار دے تے آرٹیکل 248 دے تحت دِتا گیا تاحیات استثنیٰ وی کالعدم قرار دِتا جاوے۔

سپریم کورٹ ایس توں پہلاں وی ستائیسویں ترمیم خلاف اک درخواست وصول کرن توں انکار کر چکی اے۔