عمران دے دونویں پتر جدوں چاہن پاکستان آ سکدے نیں: خواجہ آصف

سلیمان تے قاسم دے نائیکوپ مؤثر نیں، انہاں نوں ویزے دی لوڑ ای نہیں: وزیر دفاع دا بیان

لاہور (مانیٹرنگ ڈیسک، این این آئی) — وزیر دفاع خواجہ آصف نے آکھیا اے کہ بانی پی ٹی آئی عمران خان دے پتر سلیمان خان تے قاسم خان آخری واری 2022 وچ نائیکوپ اُتے پاکستان آئے سن تے اج وی جے اوہ چاہن تاں پاکستان آ سکدے نیں۔ نائیکوپ رکھن والے پاکستانی شہریاں نوں پاکستان آون لئی ویزے دی لوڑ نہیں ہوندی۔

ایکس اُتے خواجہ آصف نے آکھیا کہ دواں دے نائیکوپ کارڈ موجود نیں۔ سلیمان خان دا نائیکوپ 6 جنوری 2030 تک تے قاسم خان دا نائیکوپ 8 نومبر 2032 تک مؤثر اے۔ ایس لئی انہاں دے خاندان یا پی ٹی آئی ولوں ایہ تاثر دینا غلط اے کہ حکومت انہاں نوں ویزا نہیں دے رہی، کیوں جو نائیکوپ موجود ہون دی صورت وچ انہاں نوں پاکستان آون لئی ویزے دی لوڑ نہیں۔

دوجے پاسے، وزیر دفاع خواجہ آصف نے گزشتہ روز علامہ اقبال انٹرنیشنل ایئرپورٹ لاہور دا دورہ کیتا تے مسافراں دی سہولت لئی انتظامات تے جاری بنیادی ڈھانچے دے ترقیاتی منصوبیاں دا جائزہ لیا۔

اے ایس ایف سیکنڈ ہولڈ (انٹرنیشنل) ایریا دے دورے دوران وزیر دفاع نے خواتین مسافراں دی لمبی قطار ویکھی تے اضافی سرچ کاؤنٹر کھولن دی ہدایت کیتی۔ خواجہ آصف نے نویں تعمیر کیتے گئے امیگریشن ایریا دے کاؤنٹراں دا وی معائنہ کیتا۔

بعد وچ انہاں نے زیرِ تعمیر ڈومیسٹک ڈیپارچر ایریا دا دورہ کیتا تے ڈیپارچر ڈراپ آف لین اُتے ٹریفک دے رش اُتے تشویش دا اظہار کردیاں ضروری ہدایتاں جاری کیتیاں۔