وزیر اعظم آزاد کشمیر نوں مشورہ اے، سیاست سکھو: نجم سیٹھی
کسے نال جھگڑا نہ کرو، ساریاں نوں نال لے کے چلو، رانا ثنا نوں سیاسی مشیر رکھ لو: نجم سیٹھی
افتخار گیلانی اسٹیبلشمنٹ دی پہلی چوائس سن: ’’اج دی گل سیٹھی دے نال‘‘ وچ گفتگو
لاہور (مانیٹرنگ ڈیسک) — سینئر تجزیہ کار نجم سیٹھی نے وزیر اعظم آزاد کشمیر افتخار گیلانی نوں مشورہ دتا اے کہ سیاست سکھن، کسے نال لڑائی جھگڑا نہ کرن تے ساریاں نوں نال لے کے چلن۔
دنیا نیوز دے پروگرام ’’اج دی گل سیٹھی دے نال‘‘ وچ گل کردیاں انہاں وزیراعظم گیلانی نوں آکھیا کہ تسی حکومت تے پارلیمنٹ چلانی اے، تسی سکیورٹی دے معاملات وی ویکھنے نیں۔ ایہ نہ کرنا کہ سارے معاملات کسے ہور دے حوالے کر دیو، کیوں جو سیاست بڑی اہم ہوندی اے۔ انہاں لئی سیاست سکھنا وی ضروری اے۔
نجم سیٹھی نے آکھیا کہ ایس لئی پرانے لوکاں نوں نال لے کے چلنا پئے گا تے اپوزیشن نال مذاکرات کرنے پین گے۔ میں سمجھنا واں کہ انہاں نوں اک چنگا سیاسی مشیر رکھنا چاہیدا اے۔ ایس وقت میرے ذہن وچ مشیر دا اک ناں آ رہیا اے، جیہڑے اندر سیاسی شعور اے، اوہ رانا ثنا اللہ نیں۔
انہاں مزاحیہ انداز وچ آکھیا کہ افتخار گیلانی نوں رانا ثنا اللہ دے گھٹنے پھڑ لینے چاہیدے نیں تے آکھنا چاہیدا اے کہ تسی میرے مشیر بن جاؤ۔
نجم سیٹھی نے ہور آکھیا کہ افتخار گیلانی اسٹیبلشمنٹ دی پہلی چوائس سن، کیوں جو اوہ پڑھے لکھے وی نیں، نوجوان نیں تے ڈلیور کر سکدے نیں۔ پر فیر اک سوال پیدا ہوندا اے کہ جے انہاں دے پچھے اسٹیبلشمنٹ سی تاں اوہ انتخابات کیوں ہار گئے؟ ایس بارے مینوں معلومات نہیں ملی کہ اصل وجہ کی سی۔
انہاں آکھیا کہ ہن اسٹیبلشمنٹ تے مسلم لیگ (ن) وچکار اتفاق ہو گیا اے کہ مشترکہ نمائندہ ہووے گا۔ ساریاں نے ایہ فیصلہ کیتا ہووے گا کہ ایس قسم دے بندے دی لوڑ اے جیہڑا چنگی گورننس وی کر سکے تے سکیورٹی دے معاملات وی ویکھ سکے۔
نجم سیٹھی نے آکھیا کہ میرا خیال اے نواز شریف نے افتخار گیلانی نوں نامزد کرکے بہت چنگا کیتا اے۔ انہاں دا ریکارڈ چنگا اے۔ ممکن اے نواز شریف نے ایہ ہدایت دتی ہووے کہ تسی گورننس اُتے توجہ دیو، کشمیر وچ ترقیاتی کم کرو، تعلیم تے صحت اُتے کم کرکے لوکاں دے دل جتو، باقی معاملات اُتے اسی توجہ کر لاواں گے۔
