مُلک وچ اتحاد تے قانون دی بالادستی دا قیام ناگزیر: ملی یکجہتی کونسل
امریکا تے اسرائیل پاکستان نوں مستحکم نہیں ویکھنا چاہندے: علامہ ناصر عباس، لیاقت بلوچ
اُمہ مشترکہ اسلامی اقدار لئی متحد ہووے: مقررین دا ’’عشقِ پیغمبرِ اعظمؐ کانفرنس‘‘ نوں خطاب
اسلام آباد (اپنے رپورٹر توں) — سینیٹ وچ اپوزیشن لیڈر، مجلس وحدت مسلمین دے سربراہ تے ملی یکجہتی کونسل دے نائب صدر علامہ راجہ ناصر عباس جعفری نے آکھیا کہ حضور اکرمؐ اخلاقِ کریمہ دا پیکر سن۔ جے اسی حضور اکرمؐ دے نقشِ قدم اُتے چلن دے دعویدار آں تاں ساڈے اندر وی اخلاقِ حسنہ پیدا کرنا ضروری اے۔
انہاں آکھیا کہ پاکستان وچ اتحاد تے وحدت، قانون تے انصاف دی بالادستی قائم کرنا وقت دی اہم ضرورت اے۔ انہاں ایہ گل مجلس وحدت مسلمین پاکستان دی میزبانی وچ ملی یکجہتی کونسل دے زیرِ اہتمام ’’عشقِ پیغمبرِ اعظمؐ کانفرنس‘‘ نوں خطاب کردیاں کیتی۔
راجہ ناصر عباس نے آکھیا کہ مذہبی قیادت دی ذمہ داری اے کہ عوام نوں ایسے ہتھکنڈیاں توں دور رکھے، جیہڑے انہاں نوں مسلکی اختلافات تے باہمی انتشار ول لے جاندے نیں۔
انہاں آکھیا کہ امریکا تے اسرائیل پاکستان نوں مستحکم نہیں ویکھنا چاہندے، پر افسوس اے کہ ساڈے حکمران انہاں طاقتواں دے سب توں ودھ تابعدار بنے ہوئے نیں۔ ایہی طرزِ حکمرانی ملک نوں موجودہ صورتحال تک لے کے آیا اے۔
جماعت اسلامی دے رہنما لیاقت بلوچ نے امریکی تے اسرائیلی جارحیت دی کھل کے مذمت کیتی تے اتحاد تے وحدت نوں وقت دی اہم ضرورت قرار دتا۔
مہمانِ خصوصی وزیر مذہبی امور خیبر پختونخوا عدنان قادری نے حضرت محمد مصطفیٰؐ تے آلِ محمدؐ نال محبت تے عقیدت دا اظہار کردیاں اتحادِ اُمت دی اہمیت اُتے زور دتا۔
جماعت اہلِ حرم دے سربراہ گلزار نعیمی نے آکھیا کہ اُمت نوں مشترکہ اسلامی اقدار لئی متحد ہونا چاہیدا اے۔
کانفرنس نوں علامہ عارف واحدی، عبدالقدوس، قاری محمد عمیر آصف، عبدالحمید گل، ڈاکٹر علی عباس، طیب شاہ بخاری، سلطان قادری، سید عبدالوحید شاہ، پیر سید سعادت علی شاہ تے ڈاکٹر ضمیر اختر نے وی خطاب کیتا تے اُمتِ مسلمہ دے اتحاد اُتے زور دتا۔
