وفاقی دارالحکومت وچ سول ملازماں دی تعداد 5 لاکھ 39 ہزار
وفاقی دارالحکومت وچ سول ملازماں دی تعداد 5 لاکھ 39 ہزار
وفاقی افسراں تے ملازماں دا مجموعی تناسب 18 ملازماں اُتے اک افسر دی تعیناتی اے، سیکرٹریٹ وچ ہر 4 ملازماں اُتے تے سول آرمڈ فورسز وچ 90 ملازماں اُتے اک افسر
اسلام آباد (ایس ایم زمان) — وفاقی حکومت دے یکم جولائی 2024 تک دے اعداد و شمار مطابق گریڈ 1 توں 22 تک سول ملازماں دی مجموعی تعداد 5 لاکھ 39 ہزار 81 اے۔
اعداد و شمار مطابق بنیادی سکیل 1 توں 16 تک 5 لاکھ 11 ہزار 212، جدوں کہ گریڈ 17 توں 22 تک 27 ہزار 869 ملازم نیں۔
وفاقی پاک سیکرٹریٹ وچ 13 ہزار 133 ملازم کم کر رہے نیں۔ وفاقی سیکرٹریٹ وچ ہر 4 ملازماں اُتے اک افسر تعینات اے، جیہڑا وفاقی وزارتاں وچ افسراں دی تعداد دا تناسب نسبتاً زیادہ ظاہر کردا اے۔
مجموعی طور اُتے وفاقی افسراں تے ملازماں دا تناسب 18 ملازماں اُتے اک افسر دی تعیناتی دا اے، جدوں کہ سول آرمڈ فورسز وچ 90 ملازماں اُتے اک افسر دا تناسب اے۔ انہاں وچ 10 ہزار 563 گریڈ 1 توں 16 تے 2 ہزار 570 گریڈ 17 توں 22 دے افسر شامل نیں۔
وفاقی وزارتاں دے ماتحت محکماں وچ ملازماں دی کل تعداد 2 لاکھ 25 ہزار 98 اے، جنہاں وچ 2 لاکھ 5 ہزار 315 گریڈ 1 توں 17 تے 19 ہزار 783 گریڈ 17 توں 22 دے افسر کم کر رہے نیں۔
سول آرمڈ فورسز وچ مجموعی طور اُتے 2 لاکھ 29 ہزار 472 اہلکار تعینات نیں، جنہاں وچ 2 لاکھ 26 ہزار 952 گریڈ 1 توں 16، جدوں کہ 2 ہزار 520 گریڈ 17 توں 22 وچ نیں۔
وفاقی وزارتاں دے ماتحت محکماں وچ 62 ہزار 99 تے آئینی اداریاں وچ 9 ہزار 279 ملازم اپنے فرائض سرانجام دے رہے نیں۔
رپورٹ مطابق افسر تے ماتحت عملے دے تناسب وچ سول آرمڈ فورسز وچ ایہ تناسب سب توں ودھ اے، جتھے اک افسر دے مقابلے وچ 90 ماتحت اہلکار کم کر رہے نیں، یعنی تناسب 1:90 اے۔
سول آرمڈ فورسز دے ماتحت دفاتراں وچ ایہ تناسب 1:49 اے، جدوں کہ وفاقی وزارتاں دے محکماں وچ ہر اک افسر دے مقابلے وچ 10 ماتحت ملازم، یعنی تناسب 1:10 ریکارڈ کیتا گیا اے۔
وفاقی سیکرٹریٹ تے آئینی اداریاں وچ افسراں تے عملے دا تناسب سب توں گھٹ یعنی 1:4 اے، جس دے مطابق انہاں اداریاں وچ افسراں دی نسبتاً زیادہ تعداد موجود اے۔ وفاقی حکومت وچ مجموعی طور اُتے افسراں تے عملے دا تناسب 1:18 اے۔
رپورٹ مطابق وفاقی حکومت وچ کم کرن والیاں خواتین ملازماں دی مجموعی تعداد 27 ہزار 784 اے، جنہاں وچوں 6 ہزار 852 بنیادی سکیل 17 توں 22 وچ خدمات سرانجام دے رہیاں نیں۔
سی ایس ایس امتحانات دے ذریعے بھرتی ہون والے مختلف آکوپیشنل گروپاں وچ کم کرن والے کل افسراں دی تعداد 6 ہزار 784 اے۔ مذکورہ سروس گروپاں وچ ان لینڈ ریونیو تے کسٹمز گروپ سب توں وڈا اے، جیہڑا کل تعداد دا 17.82 فیصد یعنی ایک ہزار 209 افسراں اُتے مشتمل اے۔
آکوپیشنل گروپاں وچ کم کرن والیاں خواتین افسراں دی تعداد ایک ہزار 591 اے، جنہاں وچوں ان لینڈ ریونیو تے کسٹمز سروس گروپ وچ 317 خواتین افسر خدمات سرانجام دے رہیاں نیں، جیہڑیاں ایس گروپ وچ 19.92 فیصد نیں۔
وفاقی محکماں وچ مجموعی طور اُتے 2 ہزار 293 معذور افراد وی بطور ملازم اپنے فرائض سرانجام دے رہے نیں۔
وفاقی حکومت دے کل ملازماں وچ سب توں زیادہ تعداد بنیادی سکیل 5 دے ملازماں دی اے، جیہڑے مجموعی افرادی قوت دا 19.31 فیصد بن دے نیں۔
