جی ایچ کیو وچ ترک مسلح افواج دے یومِ فتح دی تقریب
آئی ایس پی آر ولوں باہمی دوستی اُتے خصوصی نغمہ جاری، سوشل میڈیا اُتے بھرپور پذیرائی، تقریب وچ پاک فوج دے افسران، ترکیہ دے سفارتخانے دے حکام تے ہور مہماناں دی شرکت
اسلام آباد — جنرل ہیڈکوارٹرز (جی ایچ کیو) راولپنڈی وچ ترک مسلح افواج دے یومِ فتح دی 104ویں سالگرہ دے موقع اُتے تقریب منعقد کیتی گئی۔ پاکستان وچ ترکیہ دے سفیر عرفان نذیر اوغلو نے تقریب وچ بطور مہمانِ خصوصی شرکت کیتی۔
تقریب وچ پاکستان تے ترکیہ دے درمیان برادرانہ تعلقات تے قریبی دوطرفہ روابط نوں اجاگر کیتا گیا۔ پاک ترکیہ تعلقات سانجھی قدراں، باہمی احترام تے اک دوجے لئی غیرمتزلزل حمایت دی تاریخ اُتے مبنی نیں۔
تقریب دے شرکاء نے ترک مسلح افواج دی بہادری تے قربانیاں نوں خراجِ عقیدت پیش کیتا تے پاکستان تے ترکیہ دے درمیان دیرینہ دفاعی تے تزویراتی شراکت داری نوں ہور مضبوط بناؤن دے عزم دا اعادہ کیتا۔
تقریب وچ پاک فوج دے افسران، ترکیہ دے سفارتخانے دے حکام تے ہور معزز مہماناں نے شرکت کیتی۔ تقریب دا اختتام جمہوریہ ترکیہ دے عوام تے مسلح افواج لئی نیک خواہشات دے اظہار نال ہویا۔
ایس موقع اُتے آئی ایس پی آر نے پاکستانی فنکاراں دی آواز وچ پاک ترک دوستی اُتے اک خصوصی نغمہ وی جاری کیتا۔
آئی ایس پی آر نے ترکیہ دے 104ویں یومِ فتح اُتے منفرد نغمہ ’’دو دل، اک جان‘‘ جاری کر دِتا۔ نغمے وچ پاکستانی فنکاراں نے اردو تے ترک زبان وچ آواز دا جادو جگا کے پاک ترک تاریخی تے برادرانہ تعلقات دی عکاسی کیتی اے۔
نغمے دی موسیقی علی مصطفیٰ نے تیار کیتی، جدوں کہ کمپوزیشن کامران اللہ خان تے سامعہ گوہر دی اے۔ ایس خوبصورت نغمے نوں عثمان رئیس تے ڈاکٹر مبشرہ حفیظ نے گایا اے۔
نغمے وچ پاک ترک دوستی، سانجھی ثقافت تے باہمی محبت دا اظہار وی کیتا گیا اے۔ ایس وچ پاکستان تے ترکیہ دے درمیان لازوال دوستی، بھائی چارے تے محبت دی خوبصورت عکاسی کیتی گئی اے۔
نغمے دی ریلیز توں بعد اینوں ترکیہ دے اہم ڈیجیٹل تے سوشل میڈیا پلیٹ فارماں اُتے بھرپور پذیرائی مل رہی اے۔ ترکیہ دے نشریاتی ادارے ٹی آر ٹی نیٹ ورک نے وی سوشل میڈیا اُتے نغمہ اپ لوڈ کر کے دوناں ملکاں دے ثقافتی تعلقات نوں اجاگر کیتا۔
یوٹیوب، ایکس، انسٹاگرام تے ٹک ٹاک اُتے نغمے دے مختصر کلپس، خاص طور اُتے پاک ترک روایتی سازاں دے امتزاج نوں نمایاں پذیرائی حاصل ہو رہی اے۔
