مریم نواز دا تمام معروف شاہراواں اُتے بائیک لین مقرر کرن دا حکم
زیبرا کراسنگ دی پابندی یقینی بناؤن لئی پہلا پائلٹ پراجیکٹ شروع کرن تے فیروزپور روڈ نوں وی ماڈل قرار دین دی ہدایت، شاہدرہ تے ٹھوکر نیاز بیگ اُتے ٹریفک جام دے سدباب لئی اقدامات کیتے جان: وزیراعلیٰ، افتخار گیلانی دی ملاقات
لاہور (مانیٹرنگ ڈیسک) — وزیراعلیٰ پنجاب مریم نواز شریف نے تمام معروف سڑکاں اُتے بائیک لین مقرر کرن تے پیدل سڑک پار کرن والے لوکاں لئی زیبرا کراسنگ دی پابندی یقینی بناؤن دا حکم دِتا اے۔
تفصیلات مطابق وزیراعلیٰ دی زیرِصدارت خصوصی اجلاس ہویا، جس وچ ٹریفک مینجمنٹ نال متعلق امور دا جائزہ لیا گیا۔ اجلاس وچ پیدل سڑک پار کرن والے لوکاں لئی الرٹ بٹن نصب کرن دی تجویز اُتے غور کیتا گیا تے راہگیراں دی زیبرا کراسنگ توں گزرن دی پابندی یقینی بناؤن لئی کیمریاں دے ذریعے ڈیجیٹل نگرانی اُتے اتفاق وی کیتا گیا۔
وزیراعلیٰ نے ستھرا پنجاب دیاں گاڑیاں ولوں ٹریفک قوانین دی خلاف ورزی اُتے برہمی دا اظہار کردیاں انہاں نوں ہر صورت ٹریفک قوانین دا پابند بناؤن دا حکم دِتا۔
وزیراعلیٰ مریم نواز شریف نے ستھرا پنجاب دی گاڑی تھلے آ کے کمسن بچی دے جاں بحق ہون دے واقعے اُتے دکھ تے افسوس دا اظہار کیتا۔
انہاں شاہدرہ تے ٹھوکر نیاز بیگ اُتے ٹریفک جام دے سدباب لئی فوری اقدامات کرن دی ہدایت کیتی۔ انہاں زیبرا کراسنگ دی پابندی یقینی بناؤن لئی مال روڈ اُتے پہلا پائلٹ پراجیکٹ شروع کرن دا حکم دِتا تے مال بردار ٹریکٹر ٹرالیاں نوں کور کیتے بغیر سڑک اُتے آون دی پابندی یقینی بناؤن دی ہدایت وی کیتی۔
وزیراعلیٰ نے گنے دا سیزن شروع ہون توں پہلاں ٹریکٹر ٹرالیاں اُتے اوورلوڈنگ دے سدباب لئی کارروائی کرن، فیروزپور روڈ نوں لاہور دا ماڈل روڈ قرار دین تے پائن ایونیو، جاتی امراء چوک وچ ٹریفک مینجمنٹ لئی سگنل لگاؤن دی ہدایت کیتی۔
مریم نواز شریف نے جنوبی ایشیا وچ لاہور دی ٹریفک رینکنگ وچ بہتری اُتے خوشی دا اظہار کیتا۔ انہاں آکھیا کہ لاہور دے داخلی تے خارجی راستیاں اُتے ٹریفک دی آمدورفت وچ کسے وی قسم دی رکاوٹ نہیں آنی چاہیدی۔
سی ٹی او لاہور سید عبدالرحیم شیرازی نے اجلاس نوں بریفنگ دِتی کہ نمبیو (Numbeo) گلوبل ٹریفک رینکنگ انڈیکس وچ لاہور دنیا دے 149 شہراں توں بہتر ہو چکیا اے۔
بریفنگ مطابق جاتی امراء چوک، پائن ایونیو، ڈیفنس موڑ، کریم بلاک، اکبر فلائی اوور، کاہنہ تے مین بلیوارڈ وچ ٹریفک دے ہجوم وچ 70 فیصد تک کمی آئی اے۔
16 توں 18 سال دے بچیاں لئی 4096 ٹریفک پرمٹ تے لائسنس جاری ہو چکے نیں، جدوں کہ لاہور وچ مختلف مقامات اُتے خواتین لئی 65 ہزار پینک بٹن وی نصب کیتے جا چکے نیں۔
مریم نواز نال افتخار گیلانی دی ملاقات
دوجے پاسے وزیراعلیٰ پنجاب مریم نواز شریف نال آزاد جموں و کشمیر دے نو منتخب وزیراعظم بیرسٹر افتخار گیلانی نے گزشتہ روز ملاقات کیتی۔
مریم نواز شریف نے بیرسٹر افتخار گیلانی نوں آزاد کشمیر دا وزیراعظم منتخب ہون اُتے مبارکباد دِتی۔
ایس موقع اُتے وزیراعظم آزاد کشمیر نے مریم نواز تے پاکستان مسلم لیگ (ن) دی قیادت دا شکریہ ادا کیتا تے آزاد کشمیر دی ترقی لئی 100 روزہ اصلاحاتی ایجنڈے اُتے عملدرآمد دے عزم دا اعادہ کیتا۔
افتخار گیلانی نے آکھیا کہ آزاد جموں و کشمیر دی ترقی لئی پنجاب دے پراجیکٹ مشعلِ راہ نیں۔ انہاں آکھیا کہ قائد محمد نواز شریف دی رہنمائی وچ آزاد کشمیر نوں ترقی دی مثال بنانا چاہندے آں۔
