پانی نوں ہتھیار نئیں بنن دیواں گے: شہباز شریف، پاکستان نے شنگھائی تعاون تنظیم دی چیئرمین شپ سنبھال لئی

پاکستان پائیدار علاقائی امن لئی پُرعزم، عالمی معاہدیاں اُتے انہاں دی روح دے مطابق مکمل عملدرآمد ضروری، دہشت گرداں نوں افغان سرزمین استعمال نئیں کرن دِتی جا سکدی: وزیراعظم

امریکا اسلام آباد معاہدے اُتے عمل کرے تے ایران وی کرے گا: پزشکیان، سربراہی اجلاس نوں خطاب، شہباز شریف دیاں شی جن پنگ، پیوٹن، اردوان تے ہور عالمی رہنماؤں نال ملاقاتاں

بشک یک پاکستان نے 2026-27 لئی شنگھائی تعاون تنظیم دی چیئرمین شپ سنبھال لئی۔ وزیراعظم شہباز شریف نے ایس سی او سربراہی اجلاس نوں خطاب کردیاں آکھیا کہ پاکستان پائیدار علاقائی امن لئی پُرعزم اے، عالمی معاہدیاں اُتے انہاں دی روح دے مطابق مکمل عملدرآمد ضروری اے۔ پانی ساڈے خطے دی زندگی تے آؤن والیاں نسلیں دے مستقبل دی ضمانت اے، پانی نوں سیاسی مقاصد یا دباؤ دے ہتھیار دے طور اُتے استعمال کرنا ناقابلِ قبول اے۔

وزیراعظم نے آکھیا کہ تاریخی اجلاس وچ شریک ہونا میرے لئی اعزاز دی گل اے۔ شنگھائی تعاون تنظیم عالمی امن تے استحکام لئی اہم پلیٹ فارم اے تے ایس سی او دے 25 سال مکمل ہونا اہم سنگِ میل اے۔

انہاں آکھیا کہ پاکستان ایس سی او دا فعال تے ذمہ دار رکن اے۔ عالمی منظرنامہ ودھدی جغرافیائی کشیدگی دا شکار اے، ایس سی او مشترکہ چیلنجاں نال نمٹن دے اجتماعی عزم دی علامت اے۔ پاکستان تنازعات دے پُرامن حل تے بین الاقوامی قانون اُتے یقین رکھدا اے۔

اُنہاں دا کہنا سی کہ پاکستان نے علاقائی بحران دوران امن لئی مؤثر کردار ادا کیتا۔ پاکستان دیاں سفارتی کوششاں اسلام آباد مفاہمتی یادداشت اُتے دستخط تک پہنچیاں، تے ایہہ یادداشت خطے وچ کشیدگی گھٹاؤن ول اہم قدم اے۔

وزیراعظم نے آکھیا کہ پاکستان کثیرالجہتی نظام نوں مضبوط بناؤن دا حامی اے۔ عالمی اداریاں نوں اعلانات نوں عملی اقدامات وچ بدلنا ہووے گا۔ غزہ تے مغربی کنارے وچ انسانی المیہ ناقابلِ تصور مصیبتاں دا سبب بن رہیا اے۔ عالمی برادری فلسطینی عوام دے حقِ خودارادیت دا احترام کرے۔ جنوبی ایشیا پائیدار امن توں بغیر اپنی مکمل صلاحیت حاصل نئیں کر سکدا۔

شہباز شریف نے آکھیا کہ پانی ساڈے خطے دی زندگی تے آؤن والیاں نسلیں دے مستقبل دی ضمانت اے۔ پانی نوں سیاسی مقاصد یا دباؤ دے ہتھیار دے طور اُتے استعمال کرنا ناقابلِ قبول اے۔ عالمی معاہدیاں اُتے انہاں دی روح تے الفاظ دے مطابق مکمل عملدرآمد ضروری اے۔

انہاں آکھیا کہ دہشت گردی خطے نوں درپیش سنگین ترین خطرات وچوں اک اے۔ پاکستان نے دہشت گردی خلاف جنگ وچ 90 ہزار توں ودھ جاناں دیاں قربانیاں دِتیاں نیں، جدوں کہ دہشت گردی خلاف جنگ نال پاکستان نوں 150 ارب ڈالر توں ودھ دا نقصان ہویا۔ دہشت گرداں نوں افغان سرزمین پاکستان خلاف استعمال نئیں کرن دِتی جا سکدی۔

وزیراعظم نے آکھیا کہ ایس سی او خطے وچ 3 ارب توں ودھ لوک آباد نیں۔ پاکستان پُرامن، مستحکم تے خوشحال افغانستان دا خواہش مند اے۔ علاقائی رابطہ کاری ہُن انتخاب نئیں بلکہ تزویراتی ضرورت اے۔ سی پیک علاقائی معیشتاں نوں بحیرہ عرب نال جوڑن دا اہم ذریعہ اے۔ پاکستان علاقائی ریل، سڑک تے توانائی منصوبیاں دے فروغ لئی پُرعزم اے۔

وزیراعظم نے آکھیا کہ ایس سی او دی ترقیاتی حکمتِ عملی 2035 اُتے عملدرآمد ضروری اے۔ ایس سی او ترقیاتی بینک دا قیام اہم قدم ثابت ہووے گا۔ پاکستان غربت دے خاتمے تے سماجی تحفظ دے فروغ لئی اپنا کردار جاری رکھے گا۔

شہباز شریف دا مزید کہنا سی کہ پاکستان دی ایس سی او چیئرمین شپ دوران توانائی، آئی ٹی، صحت، ثقافت تے کھیل نوں وی ترجیح دِتی جائے گی۔ پاکستان ایس سی او وچ مصنوعی ذہانت دے انفراسٹرکچر تے گورننس فریم ورک دی تجویز وی دے گا۔

شہباز شریف نے ایکس اُتے اپنے بیان وچ آکھیا کہ ایس سی او ترقی تے مضبوطی دیاں نویاں منزلاں طے کردی رہے گی تے اپنے 3 ارب توں ودھ عوام دیاں زندگیواں وچ بامعنی تے مثبت بہتری لے کے آوے گی۔

پاکستان نے 2026-27 لئی شنگھائی تعاون تنظیم (ایس سی او) سربراہانِ مملکت کونسل دی صدارت سنبھال لئی۔ ایس سی او سربراہانِ مملکت کونسل دے اجلاس دے اعلامیے اُتے دستخط دی تقریب کرغزستان دے دارالحکومت بشکیک وچ ہوئی۔ وزیراعظم شہباز شریف نے ایس سی او اجلاس دے اعلامیے اُتے دستخط کیتے۔

اس توں پہلاں وزیراعظم شہباز شریف شنگھائی تعاون تنظیم سربراہانِ مملکت کونسل دے اجلاس وچ شرکت لئی مرکزی ہال پہنچے، جتھے کرغزستان دے صدر نے وزیراعظم دا گرمجوشی نال استقبال کیتا۔ دوناں رہنماؤں وچ مصافحہ وی ہویا۔

اجلاس وچ شریک رکن ملکاں دے رہنماؤں دی گروپ فوٹو وی ہوئی، جتھے وزیراعظم شہباز شریف عالمی رہنماؤں وچ نمایاں نظر آئے۔

ایس سی او سربراہی اجلاس وچ ایرانی صدر مسعود پزشکیان نے اپنی تقریر دوران پاکستان دیاں امن لئی کوششاں نوں سراہیا۔

ایرانی صدر نے آکھیا کہ برادر ملک پاکستان نے امن لئی اہم کردار ادا کیتا، جدوں کہ مسعود پزشکیان نے اپنی تقریر وچ اسلام آباد مذاکرات دا وی ذکر کیتا۔

انہاں آکھیا کہ دنیا وچ امن لئی اسلام آباد مذاکرات دا کردار ہمیشہ یاد رکھیا جائے گا۔ انہاں آکھیا کہ جے امریکا اسلام آباد مفاہمتی یادداشت دے تحت اپنی ذمہ داریاں پوری کرن ول واپس آندا اے تے ایران وی معاہدے اُتے عملدرآمد فوری طور اُتے دوبارہ شروع کر دے گا۔

انہاں آکھیا کہ ایران تے امریکا وچ طے پائی اسلام آباد مفاہمتی یادداشت اُتے امریکی صدر دے دستخط موجود سن، تاہم ایس دستاویز نال امریکا دی وابستگی دو ہفتیاں توں وی گھٹ عرصے تک برقرار رہی۔

انہاں آکھیا کہ امریکا ولوں اپنے وعدیاں تے ذمہ داریاں دی خلاف ورزی دے جواب وچ ایران نے وی متناسب ردعمل دِتا سی۔

دریں اثنا وزیراعظم شہباز شریف نے بشکیک وچ شنگھائی تعاون تنظیم دے سربراہی اجلاس دوران عالمی رہنماؤں نال غیررسمی ملاقاتاں کیتیاں، جنہاں وچ اہم علاقائی، عالمی تے دوطرفہ امور اُتے گل بات ہوئی۔ وزیراعظم توجہ دا مرکز بنے رہے۔

وزیراعظم نے چینی صدر شی جن پنگ تے روسی صدر ولادیمیر پیوٹن نال ملاقات کیتی۔ ترک صدر رجب طیب اردوان تے ایرانی صدر مسعود پزشکیان نال وی ملاقات ہوئی۔ انہاں دی بیلاروس دے صدر الیگزینڈر لوکاشینکو، ازبکستان دے صدر شوکت مرزائیوف، تاجکستان دے صدر امام علی رحمان تے قازقستان دے صدر قاسم جومارت توکائیف نال وی ملاقاتاں ہوئیاں۔

شہباز شریف نے بیلاروس دے صدر نوں دورہ پاکستان دی دعوت دِتی۔ دوناں رہنماؤں نے تجارت، صنعت، زراعت، انفارمیشن ٹیکنالوجی تے فنی تربیت نوں ترجیحی شعبیاں دے طور اُتے دوطرفہ تعاون ہور مضبوط کرن اُتے اتفاق کیتا۔