بلوچستان وچ آپریشن، 21 دہشت گرد ہلاک، 2 افسراں، 1 کسٹم اہلکار سمیت 6 جوان شہید
چاغی، پشین وچ کارروائیاں، این 40 کوئٹہ تفتان شاہراہ اُتے ناکہ لاؤن والے فتنہ الہندوستان دے 11 دہشت گرد مارے گئے، دھرتی دے بہادر سپوتاں نے کسٹم ہاؤس وچ خارجیاں دے داخلے دی کوشش ناکام بنا دِتی، 10 دہشت گرد ہلاک: آئی ایس پی آر
راولپنڈی، اسلام آباد سکیورٹی فورسز دیاں فتنہ الہندوستان تے فتنہ الخوارج خلاف کارروائیاں وچ 21 دہشت گرد ہلاک ہو گئے، جدوں کہ 2 افسراں تے اک کسٹمز اہلکار سمیت 6 جوان شہید ہو گئے۔
پاک فوج دے شعبہ تعلقاتِ عامہ (آئی ایس پی آر) دے مطابق سکیورٹی فورسز نے بلوچستان دے ضلع چاغی تے پشین وچ آپریشن کیتا۔ چاغی دے علاقے نوکچا تے پشین دے علاقے زیارت کراس وچ کارروائیاں کیتیاں گئیاں۔
دسیا گیا کہ 31 اگست نوں دہشت گرداں نے این 40 کوئٹہ تفتان شاہراہ اُتے آمدورفت وچ خلل پاؤن دی کوشش کیتی۔ فتنہ الہندوستان نال تعلق رکھن والے دہشت گرداں نے بھتہ خوری لئی غیر قانونی ناکہ قائم کیتا ہویا سی۔
سکیورٹی فورسز دی کارروائی دوران شدید فائرنگ دے تبادلے توں بعد 11 دہشت گرد موقع اُتے ہی ہلاک ہو گئے۔ دہشت گرداں دے قبضے وچوں وڈی مقدار وچ اسلحہ، گولہ بارود تے دھماکا خیز مواد وی برآمد ہویا۔
31 اگست تے یکم ستمبر دی درمیانی رات فتنہ الخوارج دے دہشت گرداں نے کسٹمز ہاؤس وچ داخل ہون دی کوشش کیتی۔
سکیورٹی فورسز نے مؤثر کارروائی کردیاں شدید فائرنگ دے تبادلے توں بعد 10 دہشت گرداں نوں ہلاک کر دِتا۔ فرار ہون والے دہشت گرداں نوں وی سکیورٹی فورسز نے نشانہ بنایا۔
آئی ایس پی آر دے مطابق کسٹمز ہاؤس اُتے حملہ دہشت گردی تے جرائم دے گٹھ جوڑ دا مظہر سی، جس دا مقصد کسٹمز حکام نوں اپنے قانونی فرائض دی ادائیگی توں روکنا تے علاقے وچ مجرمانہ سرگرمیاں دے تسلسل نوں یقینی بنانا سی۔
فائرنگ دے تبادلے دوران دھرتی دے چھ بہادر سپوتاں، جنہاں وچ 2 افسر تے محکمہ کسٹمز دا اک سرکاری اہلکار وی شامل سی، نے فرض دی ادائیگی دوران عظیم قربانی پیش کردیاں جامِ شہادت نوش کیتا۔
علاقے وچ باقی ماندہ دہشت گرداں دے خاتمے تے مقامی آبادی دے نال نال اہم قومی شاہراہاں دی حفاظت تے سلامتی یقینی بناؤن لئی گردونواح وچ کلیئرنس آپریشن جاری اے۔
آئی ایس پی آر دے مطابق وفاقی ایپکس کمیٹی برائے نیشنل ایکشن پلان دی منظوری تحت عزمِ استحکام دے وژن دے تحت جاری دہشت گردی خلاف بلاامتیاز مہم پوری قوت تے عزم نال جاری رہے گی۔
سکیورٹی فورسز تے قانون نافذ کرن والے ادارے ملک وچوں غیر ملکی سرپرستی تے حمایت یافتہ دہشت گردی دے ناسور دے مکمل خاتمے لئی پُرعزم نیں۔
