تجارت سہولت بورڈ دے قیام دی منظوری، بندرگاہاں دی استعداد ودھائی جائے: شہباز شریف
بورڈ سپلائی چین وچ بہتری لئی اقدامات کرے گا، نان ٹیرف معاملات اُتے فیصلے کرے گا، ورکنگ گروپس بناؤن دی ہدایت
دانش یونیورسٹی تے جناح میڈیکل کمپلیکس بارے وی جائزہ، پمز دی نرس نال ملاقات، اک کروڑ دا چیک دِتا گیا۔
اسلام آباد (نامہ نگار) وزیراعظم شہباز شریف نے تجارت سہولت بورڈ (ٹریڈ فیسلی ٹیشن بورڈ) دے قیام دی منظوری دے دِتی۔ وزیراعظم آپ ٹریڈ فیسلی ٹیشن بورڈ دی صدارت کرن گے۔
شہباز شریف دی زیرِ صدارت تجارت وچ سہولتاں دی فراہمی بارے اہم اجلاس ہویا۔ مجوزہ بورڈ تجارت دی مکمل سپلائی چین وچ بہتری لیان تے سرحد پار تجارت نال متعلق سارے نان ٹیرف معاملات اُتے فیصلے کرے گا۔
ایہ بورڈ تجارت دے فروغ لئی روڈ میپ، ٹریڈ فیسلی ٹیشن انڈیکس تے مانیٹرنگ بارے حکمتِ عملی تیار کرے گا۔ وزیراعظم نے ملک دیاں بندرگاہاں دی استعدادِ کار وچ بہتری لئی ہنگامی بنیاداں اُتے کم کرن تے مختلف ورکنگ گروپس بناؤن دی ہدایت کیتی۔
وزیراعظم نے درآمد کنندگان تے برآمد کنندگان لئی بندرگاہاں اُتے مال دی ترسیل، کلیئرنس تے ہور معاملات نوں آسان بناؤن تے زیادہ توں زیادہ سہولتاں فراہم کرن دی ہدایت کیتی۔
بریفنگ وچ دَسیا گیا کہ جاری اصلاحات دے تحت پورٹ چارجز وچ کمی کیتی گئی اے، جس توں بعد بندرگاہاں دے استعمال وچ نمایاں بہتری آئی اے۔
دریں اثنا وزیراعظم نے دانش یونیورسٹی بارے جائزہ اجلاس دی صدارت کیتی تے آکھیا کہ دانش یونیورسٹی دے قیام دے بنیادی مقاصد وچ غریب تے متوسط طبقے دے طلبہ و طالبات نوں بین الاقوامی معیار دی تعلیم تے پیشہ ورانہ تربیت فراہم کرنا شامل اے۔
اوہناں ہدایت کیتی کہ یونیورسٹی دی تعمیر دی مقررہ مدت تے منصوبے دی تفصیلات اگلے دو ہفتیاں وچ تیار کرکے پیش کیتیاں جان۔
جناح میڈیکل کمپلیکس اینڈ ریسرچ سینٹر تے فیڈرل گورنمنٹ پولی کلینک فیز ٹو ایکسٹینشن دی تعمیر بارے جائزہ اجلاس وچ وزیراعظم نے آکھیا کہ عوام نوں صحت دیاں سہولتاں فراہم کرنا حکومت دی اولین ترجیح اے تے صحت دے شعبے وچ اصلاحات دا عمل تیز کیتا جائے۔
اجلاس وچ فیصلہ کیتا گیا کہ سیکٹر جی 11 وچ زیرِ تعمیر فیڈرل گورنمنٹ پولی کلینک ایکسٹینشن نوں جناح میڈیکل کمپلیکس دے پہلے فیز دے طور اُتے شروع کیتا جائے گا۔ وزیراعظم نے پہلے فیز نوں مارچ 2027 تک مکمل کرن تے ہسپتال نوں جدید تے سٹیٹ آف دی آرٹ سہولتاں نال لیس کرن دی ہدایت کیتی۔
وزیراعظم نے وزیراعظم یوتھ پروگرام دے چیئرمین رانا مشہود احمد خان نال ملاقات وی کیتی۔ اوہناں آکھیا کہ ملک دا نوجوان ساڈا سب توں قیمتی اثاثہ تے پاکستان دے روشن مستقبل دی ضمانت اے۔
شہباز شریف نے آکھیا کہ حکومت نوجواناں نوں جدید تعلیم، ہنر، روزگار تے کاروبار دے مواقع فراہم کرن لئی سارے ممکنہ وسائل استعمال کر رہی اے۔
شہباز شریف نے وفاقی وزیر امور کشمیر و گلگت بلتستان انجینئر امیر مقام نال وی ملاقات کیتی، جس وچ آزاد جموں و کشمیر تے گلگت بلتستان نال متعلق امور، ترقیاتی منصوبیاں تے عوامی فلاح و بہبود بارے بریفنگ دِتی گئی۔
وزیراعظم نے اسلام آباد وچ نیپال دے سفارتخانے دا دورہ وی کیتا تے نیپال وچ حالیہ تباہ کن سیلاب تے لینڈ سلائیڈنگ وچ جاں بحق ہون والے افراد دی یاد وچ تعزیتی کتاب وچ اپنے تاثرات درج کیتے۔
علاوہ ازیں وزیراعظم نے پمز آتشزدگی دے واقعے وچ اپنی جان اُتے کھیل کے نومولود دی جان بچاؤن والی نرس رضیہ نورین نال ملاقات کیتی تے انہاں دی بہادری تے جذبے دی تعریف کیتی۔
شہباز شریف نے رضیہ نورین نوں اک کروڑ روپے دا چیک دِتا تے آکھیا کہ 23 مارچ نوں انہاں دیاں خدمات دے اعتراف وچ تمغۂ خدمت دِتا جائے گا۔
رضیہ نورین نے دَسیا کہ اوہناں آگ نوں ویکھیا تے جان دی پرواہ کیتے بغیر اندر چلی گئیاں۔ اوہناں اک چھوٹی بچی آصفہ نوں بچایا تے باہر لے آ کے ڈاکٹر عبدالرحمن دے حوالے کیتا تاکہ اوہ محفوظ ہتھاں وچ رہے۔
