سرگودھا وچ ہور ۷ الیکٹرو بسّاں دین دا اعلان، عوام لئی سارے وسائل حاضر نیں: مریم نواز
عوام نوں جدید، محفوظ تے آرام دہ سفری سہولتاں دی فراہمی ترجیحات وچ شامل: سرگودھا دے ارکانِ اسمبلی نال گل بات، پنجاب جنگلی حیات دے تحفظ تے فروغ لئی پاکستان ہی نئیں بلکہ پوری دنیا وچ مثال بن رہیا اے: وزیراعلیٰ پنجاب
لاہور (سٹاف رپورٹر، اے پی پی) وزیراعلیٰ پنجاب مریم نواز شریف نے سرگودھا دے شہریاں نوں ہور ۷ الیکٹرک بسّاں فراہم کرن دا اعلان کردیاں آکھیا اے کہ عوام نوں جدید، محفوظ تے آرام دہ سفری سہولتاں دی فراہمی حکومت دیاں ترجیحات وچ شامل اے۔
ایہہ اعلان اوہناں گزشتہ روز سرگودھا نال تعلق رکھن والے ارکانِ صوبائی اسمبلی نال گل بات کردیاں کیتا۔ وزیراعلیٰ پنجاب نال رکنِ اسمبلی تے صوبائی وزیر صہیب احمد ملک، منصور اعظم، میاں سلطان رانجھا، اکرام الحق، صفدر حسین ساہی، رانا منور حسین، تیمور علی خان تے سردار عاصم شیر میکن نے ملاقات کیتی۔
ایس موقعے اُتے سرگودھا وچ جاری ترقیاتی منصوبیاں، عوامی مسئلیاں تے فلاحی پروگراماں اُتے تبادلہ خیال کیتا گیا۔
وزیراعلیٰ پنجاب مریم نواز نے آکھیا کہ عوام نوں الیکٹرک بسّاں وچ، خاص طور اُتے بچیاں تے خواتین نوں آرام دہ سفر کردیاں ویکھ کے دلی اطمینان ہُندا اے۔ سرگودھا سمیت پنجاب دے ہر شہر نوں ترقی دی راہ اُتے گامزن کر دِتا گیا اے، عوام دی سہولت لئی سارے وسائل حاضر نیں۔
اوہناں آکھیا کہ پنجاب دے ہر حصے وچ بلاامتیاز تے بغیر کسے تفریق دے ترقی نواز شریف دا وژن اے تے حکومت ایس وژن دے مطابق عوامی فلاح و بہبود دے منصوبیاں اُتے عمل کر رہی اے۔
ایم پی ایز نے آکھیا کہ الیکٹرک بس سروس توں روزانہ ہزاراں افراد فائدہ چُک رہے نیں، جدوں کہ سرگودھا وچ نواز شریف انسٹی ٹیوٹ آف کارڈیالوجی دا قیام اک ناقابلِ فراموش قدم اے۔
مریم نواز نے ارکانِ اسمبلی نوں اپنے اپنے علاقیاں وچ مثالی گاؤں، ستھرا پنجاب پروگرام تے صاف پانی دے منصوبیاں دی سخت نگرانی دی ہدایت کیتی۔
دریں اثناء وائلڈ لائف ڈے دے حوالے نال اپنے پیغام وچ مریم نواز شریف نے آکھیا کہ پنجاب جنگلی حیات دے تحفظ تے فروغ لئی پاکستان ہی نئیں بلکہ پوری دنیا وچ مثال بن رہیا اے۔
اوہناں آکھیا کہ پنجاب نوں ۵۰ ہزار پرندے، ۱۰۲۰ جنگلی جانور تے ۳۰ ریچھ ریسکیو کرن دا اعزاز حاصل ہویا اے۔ وائلڈ لائف دے تحفظ لئی پنجاب وچ ۱۴ ہزار ۷۰۰ چالان تے ۱۰۵۰ ایف آئی آر درج کیتیاں گئیاں، جدوں کہ ۲۰۵ ملین روپے جرمانہ وصول کیتا گیا۔
پنجاب وچ ۱۰۴ علاقے وائلڈ لائف پروٹیکٹڈ قرار دِتے گئے تے ۳ وائلڈ لائف ری ہیبلیٹیشن سنٹر قائم کیتے گئے۔ جام پور، بیٹ لنڈی پتافی توں گدو بیراج تک پنجند انڈس ڈولفن دی محفوظ پناہ گاہ قرار دِتی گئی اے۔
پنجاب وچ پہلی واری باقاعدہ وائلڈ لائف رینجرز قائم کیتے گئے نیں تے ۵۴۴ رینجرز دی ٹریننگ مکمل ہو چکی اے۔ پٹرولنگ تے وائلڈ لائف کرائم آپریشن دا باقاعدہ آغاز وی کر دِتا گیا اے۔
اوہناں آکھیا کہ جنگلی جانوراں دے علاج لئی سٹیٹ آف دی آرٹ ویٹرنری ہسپتال کمپلیکس قائم کیتا گیا اے، جدوں کہ تاریخ وچ پہلی واری وائلڈ لائف ہاسپٹل آن ویلز تے موبائل ویٹرنری کلینک پراجیکٹ وی شروع کیتے گئے نیں۔
جنگلی حیات دے تحفظ تے فروغ نوں یقینی بناؤن لئی برسیاں پرانے فرسودہ قوانین وچ مؤثر ترامیم وی کیتیاں گئیاں نیں۔
