زرعی برآمدات وچ اضافہ معاشی خودمختاری لئی ناگزیر:احسن اقبال
قرض وقتی حل اے، بار بار آئی ایم ایف کول جانا معاشی مسئلے دا مستقل علاج نئیں، پاکستان نوں ۱۰۰ ارب ڈالر دیاں برآمدات دا ہدف حاصل کرنا ہووے گا، گول میز کانفرنس توں خطاب
اسلام آباد (وقائع نگار) وفاقی وزیر منصوبہ بندی تے ترقی احسن اقبال نے گول میز کانفرنس توں خطاب کردیاں آکھیا کہ زرعی برآمدات وچ اضافہ معاشی خودمختاری لئی ناگزیر اے، ۲۰۳۵ تک پاکستان نوں ایک ٹریلین ڈالر دی معیشت بنانا اے۔
برآمدات وچ مطلوبہ کارکردگی نہ دکھانا پاکستان دے معاشی بحران دی وڈی وجہ اے۔ برآمدات وچ اضافہ نہ ہون دی وجہ نال پاکستان نوں بار بار دوست ملکاں تے آئی ایم ایف کول رجوع کرنا پیندا اے۔ بار بار آئی ایم ایف کول جانا پاکستان دے معاشی مسئلیاں دا مستقل حل نئیں۔ سیاسی عدم استحکام تے پالیسیواں دے تسلسل وچ کمی نے پاکستان دی ترقی نوں متاثر کیتا اے۔
معاشی ترقی لئی گھٹ توں گھٹ ۱۰ سال تک پالیسیواں دا تسلسل ضروری اے۔ قرض لے کے زرمبادلہ دیاں ضرورتاں پوری کرنا وقتی حل اے، مستقل علاج نئیں۔
پاکستان نوں ۱۰۰ ارب ڈالر دیاں برآمدات دے ہدف ول ودھنا ہووے گا۔ ایہہ ہدف حاصل نہ کیتا گیا تاں پاکستان معاشی مشکلات توں باہر نئیں نکل سکے گا۔ نوجوان آبادی نوں مدِنظر رکھدیاں پاکستان نوں ۶ توں ۸ فیصد معاشی شرح نمو حاصل کرنی ہووے گی۔
زرعی ملک ہون دے باوجود پاکستان دا زرعی اجناس درآمد کرنا وڈا المیہ اے۔ ایگرو فوڈ پروسیسنگ نوں فروغ دے کے زرعی برآمدات وچ اضافہ کیتا جا سکدا اے۔ عالمی معیار اُتے پورا اترے بغیر پاکستانی زرعی مصنوعات دیاں برآمدات وچ اضافہ ممکن نئیں۔
مشرقِ وسطیٰ دی حلال گوشت دی وڈی مارکیٹ توں پاکستان بھرپور فائدہ چک سکدا اے۔ سانوں موسمیاتی تبدیلی دے چیلنجز نال ہم آہنگ ہو کے زرعی شعبے نوں اگے ودھانا ہووے گا۔
انہاں آکھیا کہ حکومت زرعی شعبے نال وابستہ ہور ایک ہزار افراد دا دوجا بیچ جلد چین روانہ کرے گی۔
