پاکستان نوں دوبارہ عروج تے زوال دے معاشی چکر وچ نئیں جان دیواں گے: وزیر خزانہ
اوکھے فیصلےآں نال معاشی استحکام ملیا، پبلک پرائیویٹ پارٹنرشپ تے نجکاری دے ذریعے سرمایہ کاری نوں فروغ ممکن اے، خسارہ ۲.۶ فیصد رہ گیا، ایف بی آر دا ٹیکس ٹو جی ڈی پی تناسب ۸.۸ فیصد توں ودھ کے ۱۰.۳ فیصد ہو گیا: تقریب توں خطاب
اسلام آباد وفاقی وزیر خزانہ محمد اورنگزیب نے آکھیا کہ اوکھے فیصلےآں دے نتیجے وچ معاشی استحکام حاصل ہویا، پاکستان نوں دوبارہ عروج تے زوال دے معاشی چکر وچ نئیں جان دیواں گے۔
اسلام آباد وچ تقریب توں خطاب کردیاں وزیر خزانہ محمد اورنگزیب دا کہنا سی کہ نجی شعبے دے سرمائے نوں متحرک کرنا معاشی ترقی لئی اہم اے۔ پبلک پرائیویٹ پارٹنرشپ تے نجکاری دے ذریعے سرمایہ کاری نوں فروغ دتا جا سکدا اے۔ پائیدار معاشی استحکام لئی ڈھانچہ جاتی اصلاحات دے ایجنڈے اُتے عمل پیرا آں۔
انہاں آکھیا کہ نجکاری دے عمل وچ شفافیت، کارکردگی تے سرمایہ کاراں دے اعتماد نوں ترجیح دتی جاوے گی۔ پی پی پیز دے ذریعے بنیادی ڈھانچے تے عوامی خدمات دے منصوبیاں وچ نجی سرمایہ کاری ودھانی ہووے گی۔ نجکاری تے پبلک پرائیویٹ پارٹنرشپ نجی شعبے نوں اگے لے کے جان دا اہم ذریعہ نیں۔
انہاں دا کہنا سی کہ معاشی ترقی لئی حکومت تے نجی شعبے وچکار شراکت داری نوں ہور مضبوط بنانا ہووے گا۔
محمد اورنگزیب نے آکھیا کہ مجموعی خسارہ ۱۲.۵ فیصد توں گھٹ کے ۲.۶ فیصد رہ گیا اے۔ ایف بی آر دیاں ٹیکس وصولیاں وچ نمایاں اضافہ ہویا اے۔ ایف بی آر دی آمدن وچ گزشتہ کجھ برسیاں دوران ۴۰ فیصد اضافہ ہویا، جدوں کہ ایف بی آر دا ٹیکس ٹو جی ڈی پی تناسب ۸.۸ فیصد توں ودھ کے ۱۰.۳ فیصد ہو گیا اے۔
وزیر خزانہ دا کہنا سی کہ آئی ٹی سروسز دیاں برآمدات گزشتہ مالی سال ۴.۶ ارب ڈالر رہیاں، آئی ٹی برآمدات وچ فری لانسرز نے ۱.۶ ارب ڈالر دا حصہ پایا۔ اشیاء دیاں برآمدات ۳۰ ارب ڈالر اُتے برقرار نیں، ایس شعبے وچ ہور کم کرن دی لوڑ اے۔
انہاں آکھیا کہ توانائی، سرکاری اداریاں، ٹیکس تے نجکاری دے شعبیاں وچ اصلاحات جاری نیں۔
