بھارت دے یکطرفہ اقدام متنازعہ جموں تے کشمیر دی حیثیت تبدیل نہیں کر سکدے: پاکستان
بھارتی دعوے مسترد، اقوامِ متحدہ دے نقشیاں وچ جموں تے کشمیر متنازع علاقہ، حتمی فیصلہ کشمیریاں دی رائے شماری نال ہونا چاہیدا اے۔ دنیا بھارتی اقدامات دا نوٹس لے تے بھارت انسانی حقوق دیاں خلاف ورزیاں بند کر کے اپنے وعدے پورے کرے: دفترِ خارجہ
اسلام آباد پاکستان نے جموں تے کشمیر بارے بھارت دے بے بنیاد دعوے مسترد کر دِتے۔ ترجمان دفترِ خارجہ دے مطابق بھارت دے یکطرفہ اقدامات متنازع جموں تے کشمیر دی حیثیت تبدیل نہیں کر سکدے۔ جموں تے کشمیر دا تنازع اقوامِ متحدہ دی سلامتی کونسل دے ایجنڈے اُتے موجود بین الاقوامی تنازعیاں وچوں اک اے۔
انہاں آکھیا کہ جموں تے کشمیر دا تنازع اقوامِ متحدہ دی سلامتی کونسل دے ایجنڈے اُتے موجود قدیم ترین تنازعیاں وچ شامل اے۔ جموں تے کشمیر دا حتمی فیصلہ کشمیری عوام دی آزادانہ تے غیرجانبدارانہ رائے شماری نال ہونا چاہیدا اے۔ رائے شماری اقوامِ متحدہ دی نگرانی وچ متعلقہ سلامتی کونسل دیاں قرارداداں دے مطابق ہونی چاہیدی اے۔
دفترِ خارجہ دا کہنا سی کہ اقوامِ متحدہ دے سرکاری نقشیاں وچ جموں تے کشمیر نوں متنازع علاقہ ظاہر کیتا گیا اے۔ بھارت دے نام نہاد سرکاری نقشیاں تے یکطرفہ خودمختاری دے دعویاں دی کوئی حیثیت نہیں۔
پاکستان نے عالمی برادری توں بھارتی اقدامات دا نوٹس لین دا مطالبہ کردیاں آکھیا کہ بھارت مقبوضہ جموں تے کشمیر وچ انسانی حقوق دیاں خلاف ورزیاں فوری طور اُتے بند کرے۔
ترجمان دفترِ خارجہ نے آکھیا کہ بھارت کشمیری عوام دے حقِ خودارادیت دے حصول لئی اپنے وعدے پورے کرے۔ کشمیری عوام دا حقِ خودارادیت متعلقہ اقوامِ متحدہ سلامتی کونسل دیاں قرارداداں دے مطابق اے۔
