ریلوے خسارہ کیس: سپریم کورٹ دا شیخ رشید دے بھرتیاں دے بیان تے حیرت دا اظہار

اسلام آباد: سپریم کورٹ نے ریلوے دے سفر نوں محفوظ بنان دا حکم دے دتا۔ چیف جسٹس پاکستان نے شیخ رشید دے بیان تے حیرت دا اظہار کردیاں ریمارکس دتے وفاقی وزیر کہندے نیں ریلوے وچ اک لکھ بھرتیاں کراں گے، محکمے وچ پہلاں ای 77ہزار ملازمین نیں، ریلوے ٹریک ڈیتھ ٹریک بن چکیا۔ چیف جسٹس پاکستان نے ریمارکس دتے چین توں ایم ایل ون دا ملن والا پیسہ اک لکھ ملازمین ای لے جان گے، چیف ایگزیکٹو افسر تے سارے ڈویژنل سپرنٹنڈنٹ نوں فارغ کرنا پوے گا۔ ایڈیشنل اٹارنی جنرل نے موقف اختیار کیتا سرکار دی کوشش اے ملازماں دی تعداد گھٹ کرکے 56ہزار تک لیائی جائے پر اک لکھ ملازمین ایم ایل ون لئی رکھے جان گے، شیخ رشید توں شاید الفاظ دے چناؤ وچ غلطی ہو گئی۔ چیف جسٹس نے سیکرٹری ریلوے دی سرزنش کردیاں ریمارکس دتے سیکرٹری صاحب تہاڈے توں ریلوے نہیں چل رہی، ریلوے دا نظام اجیہا نہیں کہ ٹرین ٹریک تے چل سکے، دنیا وچ بلٹ ٹرین چل رہی اے، ایم ایل ون منصوبے تے کوئی پیشرفت نہیں ہوئی۔ عدالت نے پلاننگ ڈویژن توں ایم ایل ون منصوبے بارے رپورٹ طلب کردیاں سماعت اک مہینے لئی ملتوی کر دتی۔