وزیراعظم ملاقات لئی ویلا نہیں دیندے، قیصر شیخ دی وزارت چھڈن دی دھمکی
ڈھائی سال وچ اک منٹ لئی وی ویلا نہیں ملیا، محسن نقوی وزیرِ داخلہ نیں، شاید ایس لئی اوہناں نال زیادہ ملدے نیں: وفاقی وزیر
ایتھے ہر لیول اُتے کرپشن ہو رہی اے، بیوروکریٹس گل اُتے عمل ہی نہیں کردے، عوام دے حالات ہور وی تکلیف دہ: ٹی وی نوں انٹرویو
اسلام آباد وفاقی وزیر قیصر شیخ نے شکوہ کیتا اے کہ وزیراعظم ملاقات لئی ویلا نہیں دیندے، کوشش اے جلد وزیراعظم نال ملاقات ہو جاوے، نہیں تے میں وزارت چھڈ دیواں گا۔
تفصیلات دے مطابق وفاقی وزیر برائے سرمایہ کاری قیصر احمد شیخ نے اک ٹی وی انٹرویو وچ حکومتی نظام، بیوروکریسی تے کرپشن اُتے شدید تحفظات دا اظہار کردیاں آکھیا کہ کوشش پوری کردا ہاں، پر تکلیف وچ ہاں تے نتائج نہیں دے پا رہیا۔ پہلے وی کئی وار سوچیا اے کہ ایس نظام توں نکل جاواں، پر فیر سوچدا ہاں کہ جیہڑا تھوڑا بہت حصہ پا رہیا ہاں، اوہ وی ختم ہو جاوے گا۔
اوہناں دسیا کہ میں اپنا 60 سالہ تجربہ استعمال کیتا، پر ایتھے ہر لیول اُتے کرپشن ہو رہی اے۔ میں پوری محنت توں بعد جدوں اگے گل کردا ہاں تے بیوروکریٹس اوہدے اُتے عمل ہی نہیں کردے۔
قیصر احمد شیخ نے شکوہ کردیاں دسیا کہ ڈھائی سال دے عرصے وچ وزیراعظم نے اوہناں نوں اک منٹ لئی وی ملاقات دا ویلا نہیں دِتا۔
اوہناں طنزیہ انداز وچ آکھیا کہ محسن نقوی وزیرِ داخلہ نیں، شاید ایس لئی وزیراعظم اوہناں نال زیادہ ملدے نیں۔
اوہناں واضح کیتا کہ اوہناں دی کوشش اے کہ جلد وزیراعظم نال ملاقات ہو جاوے، نہیں تے اپنا عہدہ چھڈ دیواں گے۔
اوہناں آکھیا کہ پہلے پارٹی دی پارلیمانی پارٹی دیاں میٹنگاں ہُندیاں سن، اک طریقۂ کار ہُندا سی، پر ہن اوہ وی گھٹ ہُندیاں نیں۔
حکومتاں دی کارکردگی اُتے گل کردیاں اوہناں دا کہنا سی کہ ملک وچ حکومتاں تاں بدل دیاں رہیاں، پر غریب عوام دی حالت وچ کوئی تبدیلی نہیں آئی، بلکہ حالات ہور وی تکلیف دہ ہو گئے نیں۔ عوام دی قوتِ خرید ختم ہو گئی اے تے غربت دی سطح ہور وی تھلے چلی گئی اے۔
