برآمدات اُتے مبنی معاشی ترقی لئی کاروباری برادری دیاں تجاویز دا خیرمقدم کراں گے: وزیراعظم
کاروباری برادری دے مسئلے فوری طور اُتے حل کرن، برآمد کنندگان نوں سپر ٹیکس توں استثنیٰ وچ توسیع دا جائزہ لین دی ہدایت، توانائی دی لاگت وچ کمی حکومتی ترجیح، صنعتکاراں دے وفد نال گل بات، 50 الیکٹرک گاڑیاں اسلام آباد پولیس دے حوالے۔
اسلام آباد وزیراعظم محمد شہباز شریف نے آکھیا اے کہ حکومت برآمدات اُتے مبنی معاشی ترقی لئی کاروباری برادری دیاں تجاویز دا خیرمقدم کرے گی۔ کاروباری سرگرمیاں دے فروغ تے کاروبار وچ آسانی لئی مؤثر اقدامات کیتے جا رہے نیں۔ توانائی دی لاگت وچ کمی حکومت دیاں اہم ترجیحات وچ شامل اے۔
وزیراعظم نے کاروباری برادری نوں درپیش مسئلیاں دے فوری تے دیرپا حل لئی اقدامات کرن تے برآمد کنندگان لئی اضافی ٹیکس توں استثنیٰ وچ توسیع دے معاملے دا جائزہ لین دی ہدایت کر دِتی۔
وزیراعظم نال ملک دے ممتاز صنعتکاراں تے کاروباری شخصیات دے وفد نے ملاقات کیتی۔ وزیراعظم آفس دے مطابق ملاقات وچ برآمدات اُتے مبنی معاشی ترقی دے فروغ لئی مشاورت کیتی گئی۔
وزیراعظم نے بجٹ سازی دوران کاروباری برادری دیاں قیمتی تجاویز اُتے شکریہ ادا کردیاں آکھیا کہ متعدد تجاویز بجٹ وچ شامل کیتیاں گئیاں نیں۔ انہاں نے حال ہی وچ قائم تجارتی سہولت بورڈ نوں تجارت دے فروغ لئی مضبوط تے مؤثر ادارہ بناؤن دے عزم دا اظہار کیتا۔
شہباز شریف نے آکھیا کہ ایف بی آر دی ڈیجیٹلائزیشن دے حوالے نال وڈا کم مکمل ہو چکیا اے۔ گزشتہ مالی سال ایف بی آر نے نفاذی کارروائیاں دے ذریعے 800 ارب روپے جمع کیتے۔ معاشی ٹیم دیاں کوششاں نال مجموعی معاشی حالات وچ خاطر خواہ بہتری آئی اے، تاہم نچلی سطح اُتے بہتری لئی ہور محنت کرنا ہووے گی تاکہ اس دے ثمرات عوام تک پہنچ سکّن۔ حکومت صنعت دیاں ضروریات دے مطابق افرادی قوت دی تربیت اُتے وی خصوصی توجہ دے رہی اے۔
وفد نوں حکومتی اقدامات اُتے بریفنگ دیندیاں دسیا گیا کہ بندرگاہاں اُتے اخراجات گھٹ تے عملی استعداد بہتر بنائی گئی اے۔ کراچی دیاں بندرگاہاں توں اندرونِ ملک رسائی بہتر بناؤن لئی موٹروے ایم 10 دی بہتری تے پیپری مال برداری راہداری اُتے کم جاری اے۔
موٹروے ایم 13 (کھاریاں، راولپنڈی) دی تعمیر نال لاہور تے اسلام آباد دے درمیان سفر دا فاصلہ گھٹ ہووے گا، جدوں کہ پاکستان ریلویز دی بہتری نال تجارتی سامان دی ترسیل تیز ہووے گی۔ حکومتی اقدامات دے نتیجے وچ آئی ٹی برآمدات وچ وی ریکارڈ اضافہ ہویا اے۔
کاروباری شخصیات نے معاشی استحکام تے حکومتی اصلاحات اُتے اعتماد دا اظہار کردیاں وزیراعظم شہباز شریف، نائب وزیراعظم اسحاق ڈار تے چیف آف ڈیفنس فورسز فیلڈ مارشل سید عاصم منیر دی قیادت وچ خطے وچ امن لئی پاکستان دے کردار نوں سراہیا۔ انہاں نے 3 ارب ڈالر دے کامیاب بانڈز اجرا نوں وی خوش آئند قرار دتا۔
دریں اثنا وزیراعظم نال اٹلی دے نویں سفیر یوگو سیارلاتانی نے ملاقات کیتی۔ وزیراعظم نے اطالوی ہم منصب جارجیا میلونی لئی نیک خواہشات دا اظہار کیتا۔ سفیر نے پاکستان تے اٹلی دے تعلقات نوں ہور مضبوط بناؤن لئی بھرپور کوششاں کرن دے عزم دا اظہار کیتا۔
بعدازاں اک تقریب وچ وزیراعظم نے جدید، محفوظ تے ماحول دوست پولیسنگ دے فروغ لئی 50 الیکٹرک گاڑیاں دیاں چابیاں وفاقی وزیر داخلہ تے آئی جی اسلام آباد دے حوالے کیتیاں۔ انہاں آکھیا کہ اسلام آباد پولیس نوں ملک دے ہور شہراں لئی رول ماڈل ہونا چاہیدا اے۔
