پختونخوا: بزرگ شہریاں لئی مفت سفری سہولت دی منظوری
60 سال تے ودھ عمر دے شہری بی آر ٹی بسیں وچ مفت سفر کر سکّن گے، سابق فاٹا تے پاٹا دیاں صنعتاں نوں سیلز ٹیکس توں وی مستثنیٰ قرار دِتا گیا۔
پشاور وزیراعلیٰ پختونخوا سہیل آفریدی دی زیرِ صدارت احساس بزرگ کارڈ نال متعلق منعقدہ اجلاس وچ بزرگ شہریاں نوں مفت بی آر ٹی سروس فراہم کرن دی منظوری دے دِتی گئی۔ دوجے پاسے پختونخوا حکومت نے سابق فاٹا تے پاٹا دیاں صنعتاں نوں سیلز ٹیکس توں وی مستثنیٰ قرار دے دِتا اے۔
تفصیلات دے مطابق احساس بزرگ کارڈ دے تحت 60 سال تے اس توں ودھ عمر دے شہری بی آر ٹی بسیں وچ مفت سفر کر سکّن گے۔ مفت سفری سہولت اُتے سالانہ 935 ملین روپے خرچ آوے گا۔ بزرگ شہریاں دی نادرا توں تصدیق توں بعد انہاں نوں احساس کارڈ جاری کر دِتے جان گے۔ بزرگ کارڈ دے غلط استعمال اُتے شہری نوں 500 روپے جرمانہ عائد کیتا جاوے گا۔
اجلاس وچ خطاب کردیاں سہیل آفریدی نے آکھیا کہ معاشرے دے بزرگ شہریاں نوں سہولتاں دی فراہمی لئی سارے ممکنہ وسائل بروئے کار لیائے جان گے۔ متعلقہ حکام احساس بزرگ کارڈ دے اجرا تے مفت سفری سہولت لئی ضروری اقدامات مقررہ مدت اندر مکمل کرن۔
دوجے پاسے خیبرپختونخوا ریونیو اتھارٹی نے سابق فاٹا تے پاٹا دیاں صنعتاں نوں سیلز ٹیکس توں مستثنیٰ قرار دین دے حوالے نال نوٹیفکیشن جاری کر دِتا اے۔ جس دے مطابق استثنیٰ لئی صنعتی یونٹ دا سابق فاٹا یا پاٹا وچ قائم ہونا لازمی اے، جدوں کہ صنعتی یونٹ دا ودہولڈنگ ایجنٹ دے طور اُتے رجسٹرڈ ہونا وی ضروری اے۔
ورچوئل یا ریموٹ ذرائع نال فراہم کیتیاں جان والیاں خدمات سیلز ٹیکس استثنیٰ وچ شامل نہیں ہون گیاں۔ سیلز ٹیکس استثنیٰ دا نوٹیفکیشن یکم اگست 2026 توں نافذالعمل ہووے گا تے 30 جون 2028 تک مؤثر رہے گا۔
