معاشی چیلنجز، پاکستان 2022 دے مقابلے بہتر پوزیشن وچ اے: موڈیز
کمزور بیرونی مالی پوزیشن تے قرضیاں دی ادائیگی دی محدود صلاحیت ہُن وی چیلنج: گریس لِم، بیرونی فنانسنگ تک رسائی وچ مسلسل بہتری تے مالیاتی اصلاحات ضروری نیں: نائب صدر۔
کراچی (مانیٹرنگ ڈیسک، آن لائن): عالمی کریڈٹ ریٹنگ ایجنسی موڈیز دی اسسٹنٹ نائب صدر گریس لِم نے آکھیا اے کہ پاکستان 2022ء دے مقابلے وچ بیرونی معاشی جھٹکیاں نال نمٹن تے انہاں نوں برداشت کرن دی بہتر پوزیشن وچ اے، جس دی وڈی وجہ پچھلے دو سال دوران حاصل ہویا معاشی استحکام تے حالیہ حکومتی اقدامات نیں۔
گریس لِم نے اک انٹرویو وچ مزید آکھیا کہ آبنائے ہرمز دے بحران دا پاکستان اُتے ممکنہ اثر وی 2022ء دے مقابلے وچ گھٹ ہووے گا۔ گھٹ مہنگائی، مستحکم شرحِ تبادلہ تے زرمبادلہ دے ذخائر وچ اضافے نے پاکستان نوں بیرونی معاشی جھٹکیاں نال نمٹن لئی ضروری مالیاتی بفر فراہم کیتا اے۔
توقع اے کہ گورننس وچ بہتری حکومت نوں بیرونی پوزیشن تے مالیاتی اشارییاں وچ حالیہ بہتری برقرار رکھن وچ مدد دےوے گی۔
اسسٹنٹ نائب صدر موڈیز نے آکھیا کہ معاشی استحکام نے پاکستان دی مختلف چیلنجز دا سامنا کرن دی صلاحیت وچ اضافہ کیتا اے، تاہم پاکستان دا کریڈٹ پروفائل ہُن وی خطراں دا شکار اے۔
پاکستان دی بیرونی مالی پوزیشن ساختی طور اُتے کمزور، برآمدی بنیاد محدود تے غیر ملکی براہِ راست سرمایہ کاری گھٹ اے، جدوں کہ قرضیاں دی ادائیگی دی استطاعت ہُن وی کمزور اے۔
گریس لِم نے آکھیا کہ پاکستان دی کریڈٹ ریٹنگ وچ ہور بہتری لئی زرمبادلہ دے ذخائر وچ توقعات توں ودھ اضافہ، سرکاری تے کمرشل ذرائع توں بیرونی فنانسنگ تک رسائی وچ مسلسل بہتری تے مؤثر مالیاتی اصلاحات ضروری نیں۔
