صوبائی ہیلتھ سیکٹر نوں عالمی معیار نال ہم آہنگ کیتا جا رہیا اے: عظمیٰ بخاری
چینی تجربات، جدید ٹیکنالوجی تے عالمی ماہرین توں پنجاب دے ہیلتھ سیکٹر نوں فائدہ ہووے گا۔ چین پاکستان نیورو سرجری مرکز ڈاکٹرز دی تربیت لئی اہم ہووے گا: وزیرِ اطلاعات پنجاب۔
لاہور وزیرِ اطلاعات تے ثقافت پنجاب عظمیٰ بخاری نے آکھیا اے کہ وزیراعلیٰ مریم نواز شریف دی قیادت وچ پنجاب دے شعبہ صحت نوں عالمی معیار نال ہم آہنگ کیتا جا رہیا اے۔ چین دے نال صحت، ہیلتھ انشورنس، طبی تربیت، تحقیق تے جدید علاج دے شعبیاں وچ تعاون نوں ہور فروغ دِتا جا رہیا اے۔
ووہان یونیورسٹی، تائی پنگ ہیلتھ تے ہور معروف چینی اداریاں دے نال پنجاب وچ ہیلتھ انشورنس دے شعبے وچ تعاون اُتے اتفاق ہویا اے، جِس نال جدید انشورنس ماڈلاں نوں فروغ ملے گا۔ اپنے جاری بیان وچ عظمیٰ بخاری نے آکھیا کہ چین پاکستان مشترکہ نیورو سرجری تربیتی تے طبی سیاحت مرکز ووہان وچ قائم کیتا گیا اے، جیہڑا طبی تربیت، تحقیق تے علمی تبادلے دے فروغ وچ اہم کردار ادا کرے گا۔
ایس مرکز دے ذریعے پاکستانی ڈاکٹرز لئی جدید طبی تربیت دے مواقع وچ وی اضافہ ہووے گا۔ وزیرِ اطلاعات نے آکھیا کہ چین پاکستان مشترکہ نیورو سرجری مرکز دے شراکت داراں وچ پنجاب انسٹی ٹیوٹ آف نیورو سائنسز، ژونگ نان ہسپتال ووہان تے سی پی ایم اے شامل نیں۔
پنجاب ہیلتھ کنیکٹ پروگرام دے ذریعے عالمی طبی ماہرین نوں پنجاب دے طبی اداریاں نال منسلک کیتا جا رہیا اے۔ چین تے پنجاب دے درمیان مشترکہ تحقیق تے جدید طبی ٹیکنالوجی دے فروغ لئی وی کوششاں جاری نیں۔
چین دے نال تعاون نال پنجاب وچ طبی تربیت، تحقیق، جدید علاج تے صحت دیاں سہولتاں دے معیار نوں ہور بہتر بناؤن وچ مدد ملے گی۔
