مون سون دا کوئی فعال نظام نہیں، گرمی ودھن دا خدشہ
زیادہ درجہ حرارت والے علاقیاں وچ ادارے الرٹ رہن، این ڈی ایم اے موسمی یا ہائیڈرولوجیکل خطرے دے خلاف آپریشنل تیاری برقرار رکھے: احسن اقبال
اسلام آباد وزیراعظم دی ہدایت اُتے نیشنل ڈیزاسٹر مینجمنٹ اتھارٹی (این ڈی ایم اے) وچ ایمرجنسی رسپانس کمیٹی دا 18واں اجلاس وفاقی وزیر منصوبہ بندی تے ترقی پروفیسر احسن اقبال دی زیرِ صدارت ہویا۔
ایمرجنسی رسپانس کمیٹی دا اجلاس این ڈی ایم اے ہیڈ کوارٹرز وچ ہویا، جِس وچ چیئرمین این ڈی ایم اے لیفٹیننٹ جنرل انعام حیدر ملک، پی ڈی ایم اے، محکمہ موسمیات تے متعلقہ وفاقی تے صوبائی اداریاں دے نمائندگان نے شرکت کیتی۔
اجلاس وچ ملک دی موجودہ موسمی صورتحال، درجہ حرارت وچ اضافے، دریاواں وچ پانی دے بہاؤ دی صورتحال تے آئندہ دنیں وچ متوقع موسمی صورتحال دا جائزہ لیا گیا۔
این ڈی ایم اے نے دَسیا کہ پاکستان وچ ایس وقت مون سون دا کوئی فعال نظام موجود نہیں، تاہم ملک دے مختلف علاقیاں وچ آئندہ دنیں دوران درجہ حرارت وچ اضافے دا امکان اے۔
این ڈی ایم اے نے ہدایت کیتی کہ زیادہ درجہ حرارت والے علاقیاں وچ ودھدے درجہ حرارت دے نتیجے وچ ممکنہ اثرات نوں مدِنظر رکھدیاں متعلقہ ادارے الرٹ رہن۔
احسن اقبال نے آکھیا کہ سارے متعلقہ ادارے کسے وی ممکنہ موسمی یا ہائیڈرولوجیکل خطرے نال نمٹن لئی آپریشنل تیاری برقرار رکھن۔
