27 ستمبر احتجاج دی کال اٹل، نظرِ ثانی نہیں کر سکدے: بیرسٹر گوہر
نیکٹا تعیناتی فوج دا اندرونی معاملہ، عمران نال ملاقاتاں نہ ہون اُتے تشویش: گفتگو
ججز انصاف دین دی کوشش کردے نیں، حکومت احکامات نہیں مندی: علیمہ خان
راولپنڈی چیئرمین پی ٹی آئی بیرسٹر گوہر نے آکھیا اے کہ 27 ستمبر احتجاج دی کال اٹل اے، ایس اُتے اسیں نظرِ ثانی نہیں کر سکدے۔ نیشنل ایکشن پلان اُتے عمل ہونا چاہیدا اے، نیکٹا وچ وی جے کوئی تعیناتی ہو رہی اے تاں ایہ فوج دا اندرونی معاملہ اے۔ اسیں کدی کسے ادارے دے سربراہ دی تعیناتی اُتے کوئی سوال نہیں چکیا۔
اڈیالہ روڈ داہگل ناکہ اُتے میڈیا نال گفتگو کردیاں انہاں نے آکھیا کہ عمران خان نال ملاقاتاں نہ ہون اُتے تشویش اے، ایس وجہ نال حالات ایس نہج تک پہنچے۔ ملاقاتاں ہوندیاں تاں پیغام آندے تے حالات بہتری ول جاندے، پر عدلیہ نے وی سانوں ہمیشہ مایوس کیتا اے۔ نویں چیف الیکشن کمشنر دی تعیناتی لئی وزیراعظم نوں اپوزیشن لیڈر نال گل کرن وچ پہل کرنی چاہیدی اے۔
دوجے پاسے عمران خان دی بہن علیمہ خان نے آکھیا کہ ججز انصاف دین دی کوشش کردے نیں، حکومت احکامات نہیں مندی۔ پوری حکومت سپریم کورٹ وچ توہینِ عدالت وچ اے۔ ججز نوں پتا اے کہ اج انصاف نہیں دین گے تاں منفی اثرات مرتب ہون گے۔ بلاجواز سزاں دینا جرم ہووے گا۔
میں عدالت نہ آندی تاں فوری وارنٹِ گرفتاری جاری ہو جاندے۔ میرے 11 وار وارنٹ نکلے، شناختی کارڈ بلاک تے بینک اکاؤنٹس منجمد ہوئے۔ اک مہینے توں میرے کیس وچ کوئی کارروائی نہیں ہو رہی۔ میرے کیس دا فیصلہ کرو، سزا دیو یا کیس ختم کرو۔
اک مہینے توں پراسیکیوشن میرے کیس توں بھج رہی اے۔ لاہور ہائیکورٹ دے جج نے استعفیٰ دِتا تے آکھیا کہ واٹس ایپ پیغاما تے فیصلے نہیں کر سکدا۔ جیہڑا جج آئین تے قانون دے مطابق چلدا اے، اونوں دھمکیاں دین لگ پینڈیاں نیں۔
