پمز وچ مکمل فری علاج لئی وزیراعظم توں منظوری لواں گا: مصطفیٰ کمال

90 فی صد مریضاں دا علاج مفت، 10 فی صد توں فیس کیوں لئی جائے: وزیرِ صحت

اسلام آباد وفاقی وزیرِ قومی صحت سید مصطفیٰ کمال نے آکھیا کہ پمز وچ مفت علاج لئی وزیراعظم توں منظوری لواں گا۔ انہاں نے گزشتہ روز پمز دے نویں ایمرجنسی سینٹر دا دورہ کیتا۔

ایس موقع اُتے گل کردیاں وزیرِ صحت نے آکھیا کہ پمز وچ 10 فی صد مریضاں توں فیس لینا نامناسب اے، 90 فی صد مریضاں دا علاج مفت اے تاں 10 فی صد توں فیس کیوں لئی جائے۔ مریضاں دے سو فی صد مفت علاج لئی وزیراعظم نال گل کراں گا۔

وزیرِ صحت نے پمز ٹراما سینٹر دا وی دورہ کیتا تے ہدایت کیتی کہ پمز ٹراما سینٹر نوں آئندہ 10 دنیں وچ مرحلہ وار فعال کیتا جائے گا۔

حکام دے مطابق 7 ارب روپے دی لاگت نال تیار کیتا گیا پمز نیو ایمرجنسی تے ٹراما سینٹر 166 بیڈز اُتے مشتمل اے۔

وفاقی وزیرِ قومی صحت نوں پمز وچ اسلام آباد ہیلتھ ریگولیٹری اتھارٹی (IHRA) دی 15 رکنی ماہرین دی ٹیم نے ہسپتال وچ طبی سہولتاں تے سروس ڈیلیوری دے معیار نوں بہتر بناؤن لئی کیتے جا رہے اقدامات بارے بریفنگ وی دِتی۔

بریفنگ وچ دَسیا گیا کہ ماہرین دی ایہ ٹیم ہسپتال دے مختلف شعبیاں وچ انفراسٹرکچر، طبی طریقۂ کار، مریضاں دے تحفظ، ریکارڈ تے دستاویزات دے نال نال طبی آلات دا تفصیلی جائزہ لے رہی اے۔

وفاقی وزیر نوں دَسیا گیا کہ ہسپتال وچ افرادی قوت تے متعلقہ طبی معیاراں اُتے عملدرآمد دی صورتحال نوں وی پرکھیا جا رہیا اے، تاں جو نقائص دی نشاندہی کرکے انہاں نوں دور کیتا جا سکے۔