سینیٹ موبائل ایپ لانچ، پارلیمانی امور تک ڈیجیٹل رسائی ممکن ہو گئی
اسلام آباد قائم مقام صدر تے چیئرمین سینیٹ سید یوسف رضا گیلانی نے سینیٹ موبائل ایپلی کیشن دا افتتاح کردیاں ایس نوں ڈیجیٹل بااختیاری، شفافیت، ادارہ جاتی کارکردگی تے عوام دوست پارلیمانی نظام ول اہم قدم قرار دِتا اے۔ ایپ دے ذریعے پارلیمانی امور تک ڈیجیٹل رسائی ممکن ہو گئی اے۔
پارلیمنٹ ہاؤس وچ تقریب نوں خطاب کردیاں سید یوسف رضا گیلانی نے آکھیا کہ سینیٹ موبائل ایپلی کیشن دا اجرا ایوانِ بالا وچ ڈیجیٹل تبدیلی دے نویں دور دی شروعات اے۔ ایہ اقدام صرف اک ایپلی کیشن دا اجرا نہیں بلکہ پارلیمانی امور وچ جدید طریقۂ کار اپنان ول پیش رفت اے۔
انہاں نے آکھیا کہ ای آفس نظام دے بعد موبائل ایپلی کیشن سینیٹ دی وسیع تر ڈیجیٹل تبدیلی دا حصہ اے، جِس نال وقت دی بچت، کارکردگی وچ اضافہ تے غیر ضروری مرحلیاں دا خاتمہ ہووے گا۔
قائم مقام چیئرمین سینیٹ سیدال خان ناصر نے آکھیا کہ ایپلی کیشن سینیٹ دے پارلیمانی سفر وچ اہم سنگِ میل اے تے شفافیت، احتساب تے درست معلومات تک رسائی نوں بہتر بنائے گی۔
وزیرِ پارلیمانی امور ڈاکٹر طارق فضل نے آکھیا کہ جدید پارلیمان لئی ایسے نظام ضروری نیں جِنہاں دے ذریعے پارلیمانی امور مؤثر انداز وچ منظم تے عوام تک پہنچائے جا سکن۔
وفاقی وزیرِ انفارمیشن ٹیکنالوجی تے ٹیلی کمیونیکیشن شزا فاطمہ خواجہ نے آکھیا کہ پارلیمان دی ڈیجیٹلائزیشن نال کارکردگی، شفافیت تے عوامی ردِعمل وچ بہتری آوے گی۔
موبائل ایپلی کیشن دے ذریعے سینیٹرز نوں قانون سازی دیاں دستاویزات، ایجنڈا، بلز، قرارداداں، کمیٹی رپورٹس، اجلاس دے شیڈول تے ہور پارلیمانی امور تک براہِ راست رسائی حاصل ہووے گی۔
