سستے گھراں دی فراہمی ساڈی ترجیح، بینک کساناں، ایس ایم ایز تے ہاؤسنگ سیکٹر نوں قرض دین: وزیراعظم
زرعی شعبہ معیشت دی ریڑھ دی ہڈی، ترقی لئی اقدامات قومی ذمہ داری، قرض دی فراہمی وچ مؤثر کردار ادا کرن والے بینکاں دی حوصلہ افزائی کراں گے: شہباز شریف
اجلاس نوں خطاب: اپنا گھر پروگرام دے تحت اک لاکھ 47 ہزار 504 درخواستاں موصول، 53 ہزار 127 منظور، وزیراعظم نوں بریفنگ، نویں آٹو پالیسی 2026 منظور، کابینہ تے پارلیمنٹ وچ پیش کیتی جاوے گی۔
اسلام آباد وزیراعظم محمد شہباز شریف نے آکھیا اے کہ گھٹ آمدن تے متوسط طبقیاں لئی سستے گھراں دی فراہمی ساڈی ترجیح اے، بینک تے مالیاتی ادارے کساناں، ایس ایم ایز تے ہاؤسنگ سیکٹر نوں قرضیاں دی فراہمی وچ اپنا کردار ادا کرن۔ جیہڑے بینک قرضیاں دی فراہمی وچ بھرپور کردار ادا کرن گے، حکومت انہاں دی حوصلہ افزائی کرے گی۔
وزیراعظم آفس ولوں جاری بیان مطابق انہاں خیالات دا اظہار مالیات تک رسائی منصوبہ 2026-28 دے حوالے نال جائزہ اجلاس دی صدارت کردیاں کیتا گیا۔ وزیراعظم اپنا گھر سکیم، زراعت تے ایس ایم ایز دے شعبیاں دی ترقی لئی فنانسنگ اُتے پیش رفت دے حوالے نال جاری اقدامات دا جائزہ لیا گیا۔
وزیراعظم نے آکھیا کہ زرعی شعبہ ملک دی معیشت وچ ریڑھ دی ہڈی دی حیثیت رکھدا اے، جس دے فروغ لئی کم کرنا قومی ذمہ داری اے۔
وزیراعظم نے کساناں نوں بلا رکاوٹ تے آسان شرائط اُتے مالی وسائل تک رسائی یقینی بناؤن دی ہدایت کردیاں آکھیا کہ گھٹ آمدن تے متوسط طبقیاں لئی سستے گھراں دی فراہمی ساڈی ترجیح اے۔
صوبائی چیف سیکرٹریز ایسے املاک دا جامع سروے کراؤن، جتھے بینک اپنے گھر دے خواہشمند افراد نوں ’’وزیراعظم اپنا گھر سکیم‘‘ دے تحت قرضہ مہیا کر سکّن۔
اجلاس نوں ہاؤسنگ، زراعت تے ایس ایم ایز دے شعبیاں دی فنانسنگ دے حوالے نال اقدامات اُتے بریفنگ دتی گئی۔ بریفنگ وچ دَسیا گیا کہ وزیراعظم اپنا گھر سکیم دے حوالے نال ہُن تک 147,504 درخواستاں موصول ہوئیاں، جنہاں وچوں 53,127 درخواستاں منظور ہو چکیاں نیں۔
وزیراعظم اپنا گھر سکیم دے تحت منظور شدہ درخواستاں دی کل مالیت 313.42 ارب روپے اے، جدوں کہ 8,739 درخواست گزاراں نوں 45.43 ارب روپے دے قرضے فراہم کیتے جا چکے نیں۔
ملک بھر وچ مورگیج دیاں شرائط پوری کرن والے پلاٹاں دی نشاندہی لئی نظام تیار کیتا جا رہیا اے، جس دا پائلٹ اسلام آباد توں ہووے گا۔
اپنا گھر سکیم نوں ہور مربوط بناؤن لئی معروف ہاؤس ڈویلپرز نوں ایس عمل وچ شامل کرن واسطے اک مؤثر طریقہ کار وضع کیتا جاوے گا۔
زرعی شعبے لئی بینکاں ولوں قرضے دا حجم اگست 2026 وچ 1.268 ٹریلین روپے رہیا، جدوں کہ ایکسیس ٹو فنانس پلان 2026-2028 دے تحت جون 2028 تک 2 ٹریلین روپے دا ہدف مقرر کیتا گیا اے۔
زرخیزی ایپ دے ذریعے آسان قرضے لئی 35,838 درخواستاں موصول ہوئیاں، جنہاں لئی 7.35 ارب روپے منظور ہوئے، جدوں کہ انہاں وچوں 1.96 ارب روپے دے قرضے جاری کیتے جا چکے نیں۔
اگست 2026 تک بینکاں ولوں ایس ایم ای شعبے نوں دتے گئے قرضیاں دا حجم 1.067 ٹریلین روپے رہیا، جدوں کہ ایکسیس ٹو فنانس پلان 2026-2028 دے تحت جون 2028 تک انہاں قرضیاں دا ہدف 2 ٹریلین روپے رکھیا گیا اے۔
سمیڈا نے گزشتہ تین مہینیاں دوران 1,096 ایس ایم ایز نوں مالیاتی خواندگی دی تربیت دتی۔
دریں اثنا، نویں آٹو پالیسی 2026-31 دے مسودے اُتے وزیراعظم دی زیرِ صدارت اجلاس ہویا تے شہباز شریف نے ایس دی اصولی منظوری دے دتی۔
ذرائع نے آکھیا کہ نویں آٹو پالیسی ہُن آئی ایم ایف نال شیئر کیتی جاوے گی، آئی ایم ایف دی منظوری توں بعد آٹو پالیسی ای سی سی وچ پیش کیتی جاوے گی۔ کابینہ دی منظوری توں بعد نویں آٹو پالیسی پارلیمنٹ وچ پیش کیتی جاوے گی۔
نویں آٹو پالیسی دا مقصد مقامی آٹو انڈسٹری وچ سرمایہ کاری، گاڑیاں دیاں برآمدات، مقامی پیداوار تے جدید ٹیکنالوجی دے فروغ لئی سازگار ماحول فراہم کرنا اے۔
