بلوچستان: سکیورٹی فورسز دے آپریشن، فتنہ الہندوستان دے 11 دہشتگرد ہلاک
خاران وچ دہشتگرداں نے سڑک بلاک کر کے ٹریفک معطل کرن دی کوشش کی، فائرنگ دے تبادلے وچ 8 ہلاک ہو گئے۔ واشک وچ کارروائی دوران 3 دہشتگرد ہلاک، دیسی ساختہ بم بناؤن وچ ورتیا جان والا 2.9 ٹن دھماکہ خیز مواد برآمد۔
راولپنڈی، اسلام آباد سکیورٹی فورساں نے بلوچستان دے ضلع خاران تے واشک وچ آپریشن کر کے فتنہ الہندوستان دے 11 دہشتگرداں نوں ہلاک کر دِتا۔
پاک فوج دے محکمہ تعلقات عامہ (آئی ایس پی آر) دے مطابق سکیورٹی فورساں نے 6 تے 7 ستمبر نوں بلوچستان دے ضلع خاران تے واشک وچ بھارتی حمایت یافتہ دہشتگرداں دی موجودگی دی اطلاع اُتے انٹیلی جنس بیسڈ آپریشن کیتا، جس دوران 11 دہشتگرد ہلاک کیتے گئے۔
6 ستمبر نوں دہشتگرداں نے خاران وچ سڑک بلاک کر کے ٹریفک معطل کرن دی کوشش کیتی۔ سکیورٹی فورساں نے فوری کارروائی کردیاں دہشتگرداں نوں گھیر لیا تے فائرنگ دے تبادلے وچ 8 بھارتی حمایت یافتہ دہشتگرد ہلاک کر دِتے۔
7 ستمبر نوں واشک دے علاقے وچ وی دہشتگرداں دی موجودگی دی اطلاع اُتے کارروائی کیتی گئی، جتھے آپریشن دوران افواج نے دہشتگرداں دی پناہ گاہ نوں مؤثر انداز وچ تباہ کر دِتا تے فائرنگ دے تبادلے توں بعد 3 دہشتگرد ہلاک کر دِتے۔
آئی ایس پی آر دے مطابق سکیورٹی فورساں نے 2.9 ٹن دھماکہ خیز مواد وی برآمد کیتا، جیہڑا دیسی ساختہ بم بناؤن لئی ورتیا جا رہیا سی۔
وزیراعظم شہباز شریف نے آکھیا کہ دہشتگرد تے انہاں دے سہولت کاراں دے مذموم عزائم کدے کامیاب نہیں ہون گے۔ بھارتی سرپرستی وچ ہون والی دہشتگردی دا مکمل خاتمہ کیتا جاوے گا۔
دہشتگرد عناصر دے خلاف کارروائیاں پوری طاقت نال جاری رہن گیاں۔
