سانحہ پمز: ذمہ داراں خلاف مقدمے، جائیداد ضبط تے ناں ECL وچ شامل کرو: سینیٹ کمیٹی
ستھرا پنجاب کارکن خودکشی معاملہ: عابد شیر علی، ایمل ولی نال تلخ کلامی، ’’تسی کون، تسی کون‘‘ دی للکار، ماحول کشیدہ
اسلام آباد (سہیل خان) سینیٹ قائمہ کمیٹی برائے انسانی حقوق وچ جے یو آئی دے سینیٹر مولانا عطا الحق درویش نے آکھیا کہ پمز واقعے وچ 14 معصوم بچیاں دے جھلسن دے باوجود اج تک ایف آئی آر درج نہ ہونا انتہائی افسوسناک اے۔ 14 بچیاں دے سڑن دا ذمہ دار کون اے؟ واقعے دی فوری ایف آئی آر درج کیتی جاوے۔
کمیٹی نے اتفاق کردیاں ملزماں دے اثاثے ایف آئی آر نال منسلک کرن تے ناں ای سی ایل وچ پاؤن دی سفارش کر دِتی اے۔
عابد شیر علی نے آکھیا کہ سانحہ پمز دے ذمہ داراں دیاں جائیداداں وی ضبط کیتیاں جان تے ذمہ داراں نوں کٹہرے وچ لیاویا جاوے۔ جے غفلت حکومت تے متعلقہ اداریاں دی اے تاں حکومت خلاف وی ایف آئی آر درج ہونی چاہیدی اے۔
اوہناں آکھیا کہ معصوم بچیاں دیاں زندگیاں نال کھیلّن والیاں نوں کسے صورت معافی نہیں ملنی چاہیدی۔ واقعے نوں دباؤن دی کوئی کوشش قابلِ قبول نہیں، شفاف تے غیرجانبدار تحقیقات کرائیاں جان۔ واقعے دے ذمہ دار بھاویں کنے وی بااثر کیوں نہ ہون، اوہناں خلاف قانونی کارروائی ہونی چاہیدی اے۔
14 بچیاں دے جھلسن دا واقعہ محض حادثہ نہیں بلکہ مجرمانہ غفلت اے۔ حکومت متاثرہ بچیاں تے انہاں دے والدین نوں انصاف فراہم کرن وچ ہور تاخیر نہ کرے۔ ایف آئی آر درج کرن وچ تاخیر نال شکوک و شبہات پیدا ہو رہے نیں۔
حکومت وضاحت کرے
اجلاس وچ سینیٹر ایمل ولی خان ولوں ستھرا پنجاب دے کارکن دی خودکشی بارے سوال اُٹھائے جان اُتے سینیٹر عابد شیر علی تے سینیٹر ایمل ولی وچ جھگڑا ہو گیا۔ ’’تسی کون او، تسی کون او‘‘ دی للکار نال ماحول کشیدہ ہو گیا تے عوامی ایجنڈا پسِ پشت چلا گیا۔
سینیٹ انسانی حقوق کمیٹی دا اجلاس ثمینہ زہری دی زیرِ صدارت شروع ہویا تاں ستھرا پنجاب دے کارکن دی خودکشی دا معاملہ اُٹھایا گیا۔ اجلاس دوران اے این پی دے سربراہ ایمل ولی خان تے (ن) لیگ دے عابد شیر علی وچ تلخ کلامی ہو گئی۔
ایمل ولی دے سوالاں اُتے عابد شیر علی غصے وچ آ گئے۔ حکمران جماعت دے سینیٹر نے آکھیا کہ تسی کمیٹی دے ممبر دے طور اُتے سوال کرو۔ سینیٹر ایمل ولی نے سخت انداز وچ چودھری نوں للکاریا، ’’تسی کون او؟‘‘ ایس اُتے بدمزگی پیدا ہو گئی۔ دوجے پاسوں شور ہویا، ’’تسی کی او؟‘‘
سینیٹر قرۃ العین مری دی اپیل اُتے دونے خاموش ہو گئے، تاہم عوامی ایجنڈا پسِ پشت چلا گیا۔
اجلاس توں بعد تلخ کلامی بارے سینیٹر ایمل ولی خان نے آکھیا کہ ناک لڑاؤن دی کوشش کرن اُتے انہاں نوں جواب مل گیا۔
سینیٹر عابد شیر علی نے اجلاس توں بعد میڈیا دے سوال اُتے آکھیا کہ ’’میں مکینک ہاں، دماغ دا میٹر ٹھیک کرنا جاننا واں۔‘‘ اوہناں آکھیا کہ ایہ اجلاس وچ صوبائیت دی گل کردیاں بار بار مریم نواز اُتے تنقید کر رہے سن۔
بعد وچ خودکشی دے واقعے اُتے پنجاب حکومت توں رپورٹ طلب کر لئی گئی۔ اجلاس دی کارروائی دوران سانحہ پمز اُتے حکومت خلاف ایف آئی آر کٹوان دی درخواست وی آ گئی۔
