گیٹس فاؤنڈیشن دے وفد دیاں وزیراعظم تے وزیرِ خزانہ نال ملاقاتاں
گیٹس فاؤنڈیشن دے وفد دیاں وزیراعظم تے وزیرِ خزانہ اورنگزیب نال ملاقاتاں
اسلام آباد گیٹس فاؤنڈیشن دے وفد دیاں وزیراعظم شہباز شریف تے وزیرِ خزانہ اورنگزیب نال ملاقاتاں ہوئیاں۔ وفد وچ گیٹس فاؤنڈیشن دیاں نمائندگان کلپنا کوچر تے انیتا زیدی شامل سن۔
شہباز شریف نے پاکستان دے ترقیاتی چیلنجز دے دوران گیٹس فاؤنڈیشن دی مسلسل معاونت تے شراکت داری نوں سراہندیاں آکھیا کہ پاکستان پولیو دے مکمل خاتمے دے مشترکہ ہدف نوں حاصل کرن لئی پُرعزم اے۔ پولیو دے خاتمے دے قومی پروگرام نوں اعلیٰ ترین سطح اُتے سرپرستی حاصل اے۔
وزیراعظم نے آکھیا کہ گیٹس فاؤنڈیشن نے پولیو دے خاتمے، صحت، غذائیت، مالیاتی شمولیت تے معاشرے دے کمزور طبقات دی فلاح و بہبود لئی قابلِ قدر کردار ادا کیتا اے۔ ڈیجیٹل ادائگیاں، غذائی تحفظ، ماں تے نوزائیدہ بچے دی صحت، غربت دا خاتمہ تے موسمیاتی تبدیلی سمیت اہم اصلاحاتی ترجیحات گورننس ریفارمز ایجنڈے دا حصہ نیں۔
وزیراعظم نے آکھیا کہ کیش لیس اکانومی پاکستان حکومت دے تبدیلی والے ایجنڈے دا بنیادی حصہ اے۔ کیش لیس پاکستان دا مقصد عام شہریاں دی زندگی آسان بنانا، حکومتی نظام وچ شفافیت ودھانا تے سرکاری رقوم بغیر کسے تاخیر یا ضیاع دے مستحقین تک پہنچانا اے۔
اُنہاں آکھیا کہ حکومت تے گیٹس فاؤنڈیشن دیاں مشترکہ کوششاں دے نتیجے وچ ڈیجیٹل ادائیگیاں وچ اضافہ ہو رہیا اے۔ مستحق خواتین نوں اپنی مالی معاونت براہِ راست، محفوظ تے باوقار انداز وچ ملنی چاہیدی اے۔
وزیراعظم نے گیٹس فاؤنڈیشن دے نال مل کے خواتین دی مالیاتی شمولیت تے معاشی خودمختاری لئی مرکوز اقدامات اُتے کم کرن دی خواہش دا اظہار کیتا۔ ملاقات وچ پاکستان تے گیٹس فاؤنڈیشن وچ تعاون تے شراکت داری نوں ہور مؤثر بناؤن دے امور اُتے وی تبادلۂ خیال کیتا گیا۔
دریں اثنا، گیٹس فاؤنڈیشن دے وفد دی وفاقی وزیرِ خزانہ اورنگزیب نال ملاقات وچ معاشی اصلاحات، انسانی وسائل تے ترقیاتی ترجیحات اُتے تبادلۂ خیال کیتا گیا۔ گیٹس فاؤنڈیشن نے پاکستان وچ انسانی وسائل تے خواتین دی معاشی شمولیت لئی تعاون جاری رکھن دے عزم دا اظہار کیتا۔
گیٹس فاؤنڈیشن دی خیبر پختونخوا دے جنوبی اضلاع وچ خواتین تے بچیاں لئی پروگرام بارے بریفنگ دِتی گئی۔ دَسیا گیا کہ ایس پروگرام دے ذریعے رواں سال 1 لاکھ 70 ہزار خواتین تے 4 لاکھ 50 ہزار بچیاں تک رسائی دی توقع اے۔
وزیرِ خزانہ نے آبادی وچ اضافے دے اثرات تے ماں تے بچے دی صحت بہتر بناؤن دی اہمیت اُتے زور دِتا۔ اعلامیے وچ خواتین دی تعلیم، بااختیاری، روزگار وچ شمولیت تے بچیاں وچ وقفے دی اہمیت اُتے وی زور دِتا گیا۔
وزیرِ خزانہ نوں ایس ایم ایز، زراعت تے گھٹ سہولتاں والے شعبیاں تک مالی رسائی ودھاؤن بارے بریفنگ دِتی گئی۔
علاوہ ازیں، وزیراعظم دی زیرِ صدارت ٹریڈ فیسیلی ٹیشن بورڈ دا پہلا اجلاس ہویا۔ شہباز شریف نے آکھیا کہ حکومت کاروباری برادری نوں ہر ممکن سہولت فراہم کرن لئی پُرعزم اے۔ تجارت دے فروغ تے کاروباری سرگرمیاں وچ آسانی پیدا کرنا حکومت دیاں اولین ترجیحات وچ شامل اے۔
وزیراعظم نے ساریاں بندرگاہاں لئی ٹائم ریلیز آٹومیٹڈ سسٹم دے مقررہ اہداف دی منظوری وی دے دِتی۔
