ترقیاتی منصوبیاں نوں وڈے شہراں توں کڈھ کے پنڈاں دی سطح اُتے لے آندے: مریم نواز
ارکانِ اسمبلی نوں کم دے معیار تے شفافیت اُتے نظر رکھن دی ہدایت، ساہیوال نوں ہور 14 الیکٹرو بسیں دین دا اعلان
نواز شریف سکولز آف ایمیننس کسے وی نجی سکول توں گھٹ نہیں، غریب تے امیر دے بچیاں نوں ترقی دے برابر مواقع ملن گے: وزیرِاعلیٰ
لاہور وزیرِاعلیٰ پنجاب مریم نواز شریف نے ارکانِ اسمبلی نوں جاری ترقیاتی منصوبیاں دے معیار تے شفافیت اُتے نظر رکھن دی ہدایت کر دتی اے۔
وزیرِاعلیٰ نال ضلع ساہیوال دے ارکانِ صوبائی اسمبلی نے ملاقات کیتی تے مختلف سیاسی تے ترقیاتی معاملے اُتے تفصیلی گل بات کیتی۔ ملاقات کرن والیاں وچ ولایت شاہ، قاسم ندیم، ارشد ملک، ندیم اسلم لودھی، رانا ریاض احمد تے محمد حنیف شامل سن۔
وزیرِاعلیٰ نے گل کردیاں ساہیوال وچ جلد 14 ہور الیکٹرو بسیں مہیا کرن دا اعلان کیتا تے ارکانِ اسمبلی نوں ساہیوال وچ جاری ترقیاتی منصوبیاں اُتے کڑی نظر رکھن دی ہدایت کیتی۔
ارکانِ اسمبلی نے مریم نواز دی عوامی خدمت دیاں کوششاں نوں سراہندیاں ساہیوال شہر دی خوبصورتی نوں شاندار تے تاریخی اقدام قرار دتا۔ اوہناں پنجاب ڈویلپمنٹ پراجیکٹ دے تحت چھوٹے وڈے شہراں تے پنڈاں وچ جاری ترقیاتی منصوبیاں اُتے وی خراجِ تحسین پیش کیتا۔
ارکانِ صوبائی اسمبلی نے ساہیوال ڈویژن لئی 10 جدید ترین نواز شریف سکولز آف ایمیننس دے اقدام نوں وی سراہیا تے ساہیوال تے ہور شہراں وچ سیوریج تے ڈرینج دے منصوبیاں اُتے اظہارِ تشکر کیتا۔
وزیرِاعلیٰ نے ارکانِ اسمبلی دا شکریہ ادا کردیاں آکھیا کہ ترقیاتی منصوبیاں نوں وڈے شہراں توں کڈھ کے پنڈاں دی سطح اُتے لے آندے آں۔
اوہناں آکھیا کہ نواز شریف سکولز آف ایمیننس وچ غریب تے امیر دے بچیاں نوں ترقی دے برابر مواقع میسر آؤن گے۔ نواز شریف سکولز آف ایمیننس دا معیار کسے وی چنگے تے وڈے پرائیویٹ سکول توں گھٹ نہیں ہووے گا۔
دریں اثنا وزیرِاعلیٰ پنجاب نے بانیٔ پاکستان قائداعظم محمد علی جناحؒ دی برسی اُتے اپنے پیغام وچ بابائے قوم قائداعظم محمد علی جناحؒ دی بصیرت افروز قیادت نوں خراجِ تحسین پیش کیتا تے قائداعظمؒ دے فرمودات اُتے عمل کرن دا عہد کیتا۔
اوہناں آکھیا کہ قائداعظمؒ نے اعلیٰ سیاسی حکمتِ عملی نال اپنے حریفاں نوں چاروں شانے چت کر دتا۔ قائداعظمؒ دورِ حاضر دے عظیم ترین سیاسی رہنما تے بلند پایہ مدبر نیں۔ انہاں دی سیاسی بصیرت تے دوراندیشی نال پاکستان دا خواب شرمندۂ تعبیر ہویا۔
