مہنگا پٹرول: حافظ نعیم الرحمان دا 20 ستمبر نوں اسلام آباد ول مارچ دا اعلان
حکمران نوشتۂ دیوار پڑھ لین، پٹرولیم لیوی ختم کرن دا فیصلہ ہن عوام سڑکاں اُتے ہی کرن گے: امیر جماعتِ اسلامی پاکستان
وزیراعظم شہباز شریف عوام دا موڈ سمجھّن تے ریلیف دین: گوجرانوالہ وچ جلسے نوں خطاب، لاہور وچ وی دھرنا جاری
گوجرانوالہ، لاہور (نیوز رپورٹر، سیاسی نمائندہ، مانیٹرنگ ڈیسک) امیر جماعتِ اسلامی حافظ نعیم الرحمن نے پٹرولیم مصنوعات اُتے لیوی ختم نہ ہون اُتے 20 ستمبر نوں اسلام آباد ول لانگ مارچ دا اعلان کردیاں آکھیا اے کہ 25 کروڑ عوام دے حقاں لئی لکھاں لوکاں دا سمندر چاروں پاسیاں توں اسلام آباد ول مارچ کرے گا۔
فارم 47 دے حکمران نوشتۂ دیوار پڑھ لین، پٹرولیم لیوی ختم کرن دا فیصلہ ہن عوام اسلام آباد دیاں سڑکاں اُتے ہی کرن گے۔ وزیراعظم شہباز شریف عوام دا موڈ سمجھّن تے فوری ریلیف دین، عوام سڑکاں اُتے نکل آئے تاں بھجن دا رستہ نہیں ملے گا۔
گوجرانوالہ وچ جلسۂ عام نوں خطاب کردیاں حافظ نعیم الرحمن نے آکھیا کہ 77 سال توں 40 فیصد غریب عوام اُتے جاگیردار تے وڈیرے مسلط نیں تے قوم دا استحصال کر رہے نیں۔ شریف خاندان دیاں ملّاں وچ کم کرن والے مزدوراں تک نوں بنیادی حق حاصل نہیں۔
پنجاب وچ خواتین نال زیادتی دے ہزاراں مقدمے درج ہو رہے نیں، جدویں کہ وزیراعلیٰ عوام دے پیسیاں نال لندن وچ عیاشی کر رہی اے۔ اوہناں مریم نواز نوں چیلنج کیتا کہ لندن دورے دے سارے اخراجات عوام دے سامنے رکھن۔
امیر جماعتِ اسلامی نے آکھیا کہ ساڑھے 11 فیصد سود وچ محض 3 فیصد کمی کر دتی جاوے تاں پٹرولیم لیوی توں کہیں زیادہ آمدنی ہو سکدی اے۔ جے آئی ایم ایف پٹرولیم مصنوعات اُتے لیوی لاؤن دا کہندا اے تاں کی مریم نواز نے جہاز آئی ایم ایف توں پچھ کے لیا سی؟ کی بینکاں دے قرضے آئی ایم ایف توں پچھ کے معاف ہوندے نیں؟
اوہناں آکھیا کہ حکومت نے پٹرولیم لیوی ختم نہ کیتی تاں حکومت گراؤ تحریک شروع کراں گے۔
اوہناں آکھیا کہ پی ٹی آئی، ن لیگ تے پیپلز پارٹی نے رل کے ایس نظام نوں تحفظ دتا، اج وی غریباں دا استحصال ہو رہیا اے۔ بچے، نوجوان تے بوڑھے بھٹیاں اُتے مزدوری کرن اُتے مجبور نیں۔
حافظ نعیم الرحمن نے آکھیا کہ 20 ستمبر نوں حکومت جتنے مرضی کنٹینر لا لے، اسی کنٹینر ہٹا کے اسلام آباد پہنچاں گے تے عوام دے حق لے کے رہاں گے۔
ایس توں پہلاں منصورہ لاہور وچ ملک بھر توں آئی جماعتِ اسلامی دی قیادت دے اجلاس دی صدارت کردیاں حافظ نعیم الرحمن نے پٹرولیم لیوی، مہنگائی تے آئی پی پیز خلاف جاری تحریک دا جائزہ لیا۔ اجلاس وچ تحریک وچ شدت لیاؤن اُتے اتفاق کیتا گیا۔
دوجے پاسے پٹرولیم لیوی خلاف جماعتِ اسلامی دے لاہور، پشاور، کراچی سمیت ملک بھر وچ درجنوں مقامات اُتے جاری دھرنے جمعہ نوں 27ویں روز وچ داخل ہو گئے۔
لاہور وچ مال روڈ اُتے دھرنے دی وجہ نال فیصل چوک نال جڑیاں سڑکاں اُتے ٹریفک دا رش رہیا۔
