ایم کیو ایم دا سندھ لوکل گورنمنٹ ایکٹ اُتے تجویز کیتا بل اسمبلی وچ جمع
میئر تے چیئرمین نوں ایڈمنسٹریٹر مقرر کرن دی مخالفت، سول سرونٹ دے تقرر دی تجویز، ملازماں، اثاثیاں دی منتقلی دی نگرانی لئی ڈیولوشن امپلی منٹیشن کمیشن قائم کرن دا وی مطالبہ
کراچی (سٹاف رپورٹر) ایم کیو ایم پاکستان دے ارکان سندھ اسمبلی ولوں سندھ لوکل گورنمنٹ ایکٹ وچ جامع اصلاحات دا مجوزہ بل سندھ اسمبلی سیکریٹریٹ وچ جمع کرا دتا گیا اے۔ پیش کیتی گئی ترمیم سپریم کورٹ دے فیصلے تے آئین دے آرٹیکل 140-A دی روشنی وچ تیار کیتی گئی اے۔
ایم کیو ایم پاکستان نے آرٹیکل 140-A دے تحت بلدیاتی حکومتاں نوں بااختیار بناؤن لئی اہم ترامیم تجویز کردیاں نیں، تے میئر تے چیئرمین نوں بطور ایڈمنسٹریٹر مقرر کرن دی سخت مخالفت کردیاں تجویز دتی اے کہ بلدیاتی اداریاں اُتے غیر منتخب ایڈمنسٹریٹر مسلط کرن دی بجائے غیر جانبدار سول سرونٹ نوں ایڈمنسٹریٹر بنایا جاوے۔
اختیار، وسائل تے ذمہ واریاں نوں تھلے دی سطح تک منتقل کرن دا مطالبہ کردیاں منتخب میئر تے چیئرمین نوں بااختیار مقامی حکومت دا انتظامی سربراہ بناؤن دی تجویز دتی گئی اے۔ پانی، سیوریج، سالڈ ویسٹ، تعلیم، صحت، ٹرانسپورٹ تے مقامی سڑکاں، بلڈنگ کنٹرول، ماسٹر پلاننگ تے ٹاؤن پلاننگ دے اختیار وی منتخب بلدیاتی حکومتاں نوں منتقل کرن دی تجویز شامل اے۔
بلدیاتی حکومتاں لئی صوبائی مالیاتی کمیشن ایوارڈ نافذ کرن، مختص صوبائی فنڈاں وچوں گھٹ توں گھٹ 70 فیصد رقم براہِ راست بلدیاتی حکومتاں نوں دین، اختیاراں دی منتقلی دے نال ملازم، اثاثے تے مالی وسائل وی بلدیاتی حکومتاں نوں منتقل کرن دیاں تجاویز دتیاں گئیاں نیں۔
ایم کیو ایم پاکستان دا مؤقف اے کہ جیہڑے کم دی ذمہ داری بلدیاتی حکومت نوں دتی جاوے، اوہدے نال مالی وسائل وی فراہم کیتے جان، جدوں کہ بلدیاتی حکومتاں دے اختیاراں نوں صوبائی مداخلت توں محفوظ بناؤن لئی قانونی تحفظ وی فراہم کیتا جاوے۔
بلدیاتی اختیاراں، فنڈاں، ملازماں تے اثاثیاں دی منتقلی دی نگرانی لئی ڈیولوشن امپلی منٹیشن کمیشن قائم کرن دی تجویز وی دتی گئی اے تے آکھیا گیا اے کہ سندھ دے شہری تے بلدیاتی مسئلے حل کرن لئی اختیار حقیقی معنیاں وچ تھلے دی سطح تک منتقل کیتے جان۔
