آخری دہشتگرد دے خاتمے تک اقدامات جاری رہن گے، کور کمانڈر کوئٹہ
امن قائم کرن دے نال بلوچستان دی ترقی دا سفر وی جاری رکھیا جاوے گا، میڈیا وفد نال گل بات، میڈیا وفد ولوں قبضے وچ لیے گئے ہتھیاراں دا مشاہدہ، سی ایم ایچ وچ زخمی جواناں دی عیادت
راولپنڈی کور کمانڈر کوئٹہ نے پاکستان دے میڈیا نمائندیاں دے وفد نال خصوصی نشست کیتی، جس وچ بلوچستان دی موجودہ سکیورٹی صورتحال، امن و امان دے قیام، دہشتگردی دے خلاف جاری اقدامات تے درپیش سکیورٹی چیلنجز بارے تفصیلی بریفنگ دتی گئی۔
کور کمانڈر کوئٹہ نے میڈیا نمائندیاں نوں بلوچستان وچ دہشتگردی دے خلاف جاری کارروائیاں بارے آگاہ کیتا۔ ایس موقع اُتے میڈیا وفد نے دہشتگرداں دے خلاف کارروائیاں دوران قبضے وچ لیے گئے ہتھیاراں، گولہ بارود تے ہور سامان دا وی مشاہدہ کیتا۔
کور کمانڈر کوئٹہ نے آکھیا کہ بلوچستان وچ پائیدار امن لئی سکیورٹی اقدامات آخری دہشتگرد دے خاتمے تک جاری رہن گے، تے بلوچستان وچ امن و امان قائم کرن دے نال صوبے دی ترقی دا سفر وی جاری رکھیا جاوے گا۔
بعد وچ وفد نے سی ایم ایچ کوئٹہ دا خصوصی دورہ کیتا تے آپریشنز دوران زخمی ہون والے پاک فوج دے جواناں دی عیادت کیتی۔ میڈیا وفد نے دہشتگردی دے خلاف جنگ وچ پاک فوج دے زخمی جواناں دی بہادری، عزم تے قربانیاں نوں خراجِ تحسین پیش کیتا تے انہاں دی جلد صحت یابی لئی دعا کیتی۔
