ریاست دے خلاف بندوق چکّن والیاں نال کسے وی صورت گل بات نہیں ہووے گی، کوئٹہ بیٹھ کے پورے صوبے نوں کنٹرول کرنا ممکن نہیں، نویں صوبے انتظامی بنیاداں اُتے بننے چاہیدے نیں: وزیرِ اعلیٰ بلوچستان
دہشت گردی کسے اِک صوبے دا نئیں، پورے ملک دا مسئلہ، سول تے عسکری قیادت متفق، کوئی ابہام نئیں، حکومت وچ تبدیلی دا فیصلہ سیاسی قیادت نے کرنا، اڑھائی اڑھائی سالہ حکومتی معاہدے دا علم نئیں، بلوچستان دے ترقیاتی منصوبے ماضی دے مقابلے وچ ریکارڈ مدت وچ مکمل ہوئے، لاپتا افراد دا مسئلہ بعض وار درست تناظر توں بغیر پیش کیتا جاندا اے: سرفراز بگٹی دی سینئر صحافیاں نال ویڈیو لنک اُتے گل بات
کوئٹہ وزیراعلیٰ بلوچستان سرفراز بگٹی نے نویں صوبیاں دی حمایت کردیاں آکھیا اے کہ کوئٹہ وچ بیٹھ کے پورے بلوچستان نوں کنٹرول کرنا ممکن نئیں، نویں صوبے بنن تاں لسانی نئیں بلکہ انتظامی بنیاداں اُتے بننے چاہیدے نیں، ریاست دے خلاف بندوق چکّن والیاں نال کسے وی صورت گل بات نئیں ہووے گی۔
سینئر صحافیاں نال ویڈیو لنک دے ذریعے گل بات کردیاں سرفراز بگٹی نے آکھیا کہ اسیں نویں صوبے بناؤن لئی تیار آں، تاہم پہلاں قومی اسمبلی وچ صوبیاں دے قیام اُتے اتفاقِ رائے ہونا چاہیدا اے۔ بلوچستان وچ سکیورٹی فورسز مشکل حالات وچ اپنے فرائض انجام دے رہیاں نیں، دہشت گردی دے خلاف جنگ وچ ریاستی ادارے ہم آہنگی نال کم کر رہے نیں، ریاست دے خلاف بندوق چکّن والیاں نال کسے وی صورت گل بات نئیں ہووے گی۔
اُنہاں آکھیا کہ وزیراعلیٰ پنجاب دا پیغام چنگا نئیں لگیا، دہشت گردی کسے اِک صوبے دا نئیں بلکہ پورے پاکستان دا مسئلہ اے تے اَیس دے خاتمے لئی قومی سطح اُتے سانجھی کوششاں دی لوڑ اے۔ بلوچستان وچ آخری دہشت گرد دی موجودگی تک جنگ جاری رہے گی، دہشت گردی دے خلاف سول تے عسکری قیادت متفق تے یکسو اے، کوئی ابہام نئیں۔
اُنہاں آکھیا کہ اسیں پہلاں پاکستانی آں، فیر بلوچ آں۔ پنجاب تے سندھ دے عوام بے فکر رہن، بلوچستان حکومت اُنہاں نوں کسے وی قسم دی پریشانی نئیں ہون دیوے گی۔ وزیراعلیٰ بلوچستان دا کہنا سی کہ بلوچستان وچ کسے اڑھائی اڑھائی سالہ حکومتی معاہدے دا اُنہاں نوں علم نئیں، حکومت وچ تبدیلی دا فیصلہ سیاسی قیادت نے کرنا اے۔
اُنہاں آکھیا کہ میں جدوں تک منصب اُتے آں، عوام دی خدمت جاری رکھاں گا۔ بلوچستان وچ ماضی دے مقابلے وچ کرپشن وچ کمی آئی اے، تعلیمی اداریاں سمیت سارے سرکاری محکمیاں وچ میرٹ یقینی بناؤن دے اقدامات جاری نیں، بلوچستان دے ترقیاتی منصوبے ماضی دے مقابلے وچ ریکارڈ مدت وچ مکمل ہوئے نیں۔
اُنہاں دا کہنا سی کہ بلوچستان توں 11 لاکھ افغان مہاجرین سمیت ہور غیر ملکی شہریاں نوں اُنہاں دے وطن واپس بھیجیا گیا اے، لاپتا افراد دا مسئلہ بعض وار درست تناظر توں بغیر پیش کیتا جاندا اے۔
افغان نیشنل آرمی دے دہشت گرداں نوں پناہ دین بارے سوال اُتے اُنہاں آکھیا کہ اِنہاں عناصر دے خلاف کارروائیاں کیتیاں جا رہیاں نیں تے بلوچستان وچ اُنہاں دی موجودگی نوں گھٹ توں گھٹ کیتا جا رہیا اے۔
