ہر شہر تے پنڈ دی ترقی ساڈا ہدف، پنجاب بہترین صوبہ بنے گا: مریم نواز
ترقیاتی منصوبیاں دی آپ نگرانی کر رہی آں: وزیراعلیٰ، پاکپتن دے ارکانِ صوبائی اسمبلی نال ملاقات، ترقیاتی منصوبیاں اُتے تبادلۂ خیال، میجر عزیز بھٹی شہید دی قربانی اُتے پوری قوم نوں فخر، وطن اُتے جاناں نچھاور کرن والے شہید پوری قوم دے ہیرو نیں: وزیراعلیٰ
لاہور وزیراعلیٰ مریم نواز شریف نے آکھیا اے کہ پنجاب دے ہر شہر تے پنڈ دی ترقی تے بہتری ساڈا ہدف تے نصب العین اے، جس لئی دن رات کوشاں آں۔ پنجاب بہترین صوبہ بنے گا، ہر شہر تے ہر علاقے دے ڈویلپمنٹ پراجیکٹ دی آپ نگرانی کر رہی آں۔
مریم نواز شریف نال گزشتہ روز پاکپتن دے ارکانِ صوبائی اسمبلی نے ملاقات کیتی، جس وچ عوامی مسئلیاں، ضروریات تے ترقیاتی منصوبیاں اُتے تبادلۂ خیال کیتا گیا۔ ملاقات کرن والیاں وچ فاروق احمد مانیکا، چودھری جاوید احمد، عمران اکرم تے سردار منصب علی ڈوگر شامل سن۔
ارکانِ اسمبلی نے پاکپتن وچ اربن تے رورل ڈویلپمنٹ نال متعلق تجاویز پیش کیتیاں تے الیکٹرو بس دے اجرا سمیت ہور ترقیاتی منصوبے شروع کراؤن اُتے وزیراعلیٰ دا شکریہ ادا کیتا۔ ارکانِ اسمبلی نے پاکپتن وچ الیکٹرو بس منصوبے نوں دہائی دا گیم چینجر قرار دتا۔
مریم نواز نے ارکانِ اسمبلی نوں ہدایت کیتی کہ پاکپتن وچ جاری ترقیاتی منصوبیاں دے معیار، رفتار تے شفافیت اُتے کڑی نظر رکھی جاوے۔ اُنہاں آکھیا کہ پاکپتن سمیت ہر شہر تے پنڈ دی ترقی تے بہتری ساڈا نصب العین اے۔ مینوں خوشی اے کہ کئی سالاں توں نظر انداز کیتا جان والا پاکپتن وی ترقی دیاں راہواں اُتے گامزن اے۔
دریں اثنا وزیراعلیٰ نے 1965 دی جنگ دے ہیرو میجر عزیز بھٹی شہید نشانِ حیدر دے یومِ شہادت اُتے اُنہاں نوں خراجِ عقیدت پیش کیتا۔ اپنے پیغام وچ اُنہاں آکھیا کہ شہید دی موت قوم لئی حیاتِ نو دا پیغام ہوندی اے۔
میجر عزیز بھٹی شہید نے دھرتی دی حفاظت کردیاں بے مثال بہادری تے شجاعت دا مظاہرہ کیتا تے وطن دے دفاع لئی اپنی قیمتی جان دا نذرانہ پیش کیتا۔
مریم نواز نے آکھیا کہ دفاعِ وطن لئی میجر عزیز بھٹی شہید دی قربانی اُتے پوری قوم نوں فخر اے۔ وطنِ عزیز دی حفاظت لئی اپنی جاناں نچھاور کرن والے شہید پوری قوم دے ہیرو تے ساڈا فخر نیں۔ اسیں اُنہاں نوں سلام پیش کردے آں تے قوم اُنہاں دیاں عظیم قربانیاں نوں کدے فراموش نئیں کرے گی۔
