عوامی اعتماد لئی ماتحت عدلیہ دے ججاں نوں بااختیار بنایا جاوے گا: یحییٰ آفریدی
عدالتی نظام وچ اصلاحات لئی زمینی حقائق نوں سمجھنا ضروری، ججاں نوں بیرونی دباؤ توں آزاد رکھن لئی ضابطۂ اخلاق تبدیل کیتا، عوامی اعتماد وراثت وچ نئیں ملدا بلکہ دیانتداری نال حاصل ہوندا اے، جامع نظامِ انصاف لئی عدلیہ دیاں ضروریات پوری کیتیاں جان گیاں: خطاب
اسلام آباد چیف جسٹس پاکستان جسٹس یحییٰ آفریدی نے آکھیا اے کہ انصاف دی بروقت فراہمی وقت دی اہم ضرورت اے، سارے ادارے اپنی ذمہ داریاں مؤثر انداز وچ ادا کرن، جدوں کہ ججاں نوں بیرونی دباؤ توں آزاد رکھن لئی ضابطۂ اخلاق وچ تبدیلی کیتی گئی اے۔ عوامی اعتماد وراثت وچ نئیں ملدا بلکہ دیانتداری نال حاصل ہوندا اے۔
ماتحت عدلیہ نظامِ انصاف وچ ریڑھ دی ہڈی دی حیثیت رکھدی اے تے شہریاں لئی انصاف دا پہلا باقاعدہ فورم اے۔ ماتحت عدلیہ دے جج مشکلات دے باوجود اپنی ذمہ داریاں ادا کر رہے نیں تے عوام دے اعتماد لئی اُنہاں نوں بااختیار بنایا جاوے گا۔
عدالتی نظام وچ اصلاحات لئی زمینی حقائق نوں سمجھنا ضروری اے۔ ماضی وچ ضلعی عدلیہ تے پالیسی ساز اداریاں دے درمیان رابطے دا فقدان رہیا اے۔ رول آف لا دے تحت عدالتاں دی رینکنگ نال متعلق ساریاں تفصیلات فراہم کیتیاں جان گیاں۔
عدالتی نظام وچ اصلاحات تے عوام نوں فوری انصاف دی فراہمی دے حوالے نال قومی کانفرنس نوں خطاب کردیاں چیف جسٹس نے آکھیا کہ ضلعی عدالتاں تے ہائیکورٹس دے درمیان رابطہ کاری ہور مضبوط کرنی ہووے گی۔ نوجوان جج وی بہترین انداز وچ انصاف دی فراہمی یقینی بناؤن۔ ملک بھر وچ جامع نظامِ انصاف لئی عدلیہ دیاں ضروریات پوری کیتیاں جان گیاں تے سارے متعلقہ افراد ایمانداری نال اپنے فرائض انجام دین۔
چیف جسٹس نے دسیا کہ عدالتاں نوں سولر نظام اُتے منتقل کیتا جا رہیا اے، انٹرنیٹ دی بہترین سہولت تے ای لائبریریاں فراہم کرن اُتے وی کم جاری اے۔ صوبائی حکومتاں دے تعاون اُتے اُنہاں دا شکریہ ادا کردیاں اُنہاں دسیا کہ بلوچستان دے 18 ضلعیاں وچ سولر، پانی تے انٹرنیٹ دی سہولت فراہم کیتی جا چکی اے، جدوں کہ باقی ضلعیاں وچ اک ماہ دے اندر ایہ سہولتاں فراہم کر دتیاں جان گیاں۔
عدالتی افسراں دیاں سہولتاں تے شرائطِ ملازمت وچ ہم آہنگی لئی کمیٹی وی قائم کیتی گئی اے۔
چیف جسٹس نے انصاف دی فراہمی دی راہ وچ جان دا نذرانہ پیش کرن والے ججاں نوں خراجِ تحسین پیش کردیاں آکھیا کہ مینوں ماتحت عدلیہ اُتے فخر اے۔ ملک بھر دے جوڈیشل افسراں نوں ہیلتھ انشورنس دی سہولت فراہم کرن دا فیصلہ کیتا گیا اے۔
اُنہاں واضح کیتا کہ ججاں نوں بیرونی دباؤ توں آزاد رکھن لئی پوری عدلیہ اُنہاں دے نال اے۔ اُنہاں خطاب دوران حاضرین نوں تالیاں بجاؤن توں روکدیاں آکھیا کہ ایس چھت دے تھلے اسیں سارے جج آں، سانوں ججاں وانگ پیش آنا چاہیدا اے۔
